«Շատ վճռորոշ մի փուլ ենք թևակոխում, և Նիկոլ Փաշինյանը շատ կարճ ժամանակ հետո էլ չի լինելու իշխանության»,- ասաց ՀՅԴ անդամ Գառնիկ Դանիելյանը «Հայելի» ակումբում՝ խոսելով ընդդիմադիր քաղաքական դաշտի միավորման մասին։
«Սա ասում եմ վստահ, որովհետև մի գիծ, մի ռուբիկոն ենք անցնում, որտեղ կամ պիտի ազգային ուժերը կառավարեն երկիրը, կամ այս խուժանները փորձեն երկիրը գլորել և տանել անդունդը։ Եվ ուզում եմ պատասխանատու կերպով ասել, որ շատ կարևոր հանդիպումներ են տեղի ունենում։ Միասնական ընդդիմադիր ճակատը բավականին լուրջ հարթակ է ստեղծում հետագա ավելի արդյունավետ աշխատանք կատարելու ուղղությամբ։ Ոչ մեկի համար գաղտնիք չէ, որ Նիկոլ Փաշինյանն ընդվզում է մեր ազգային արժեքների, եկեղեցու դեմ։ Ամենուր բռնություններ են, և այդ բռնության ցցուն օրինակը նաև Սամվել Կարապետյանն է, որը կրկին կալանավորվեց այն օրը, երբ պետք է տեղի ունենար ընդդիմության ուժերի հանդիպումը։ Դա երկար ժամանակ քննարկվել և օրը որոշվել էր։ Նիկոլ Փաշինյանը փորձեց մեկուսացնել Սամվել Կարապետյանին, սակայն ընդդիմադիր ուժերը համախմբվեցին։ Եվ նրանք միասնական ճակատով հանդես գալու ոչ հրապարակային երդում են տվել»,- ասաց Գառնիկ Դանիելյանը։
«Ես չեմ պատկերացնում որևէ ուժ, որը չի գիտակցում պահի լրջությունը։ Այս ընթացքը կասեցնելու, բեկելու, ալիևյան սահմանադրությունը չեղարկելու և ի վերջո այս իշխանություններին վռնդելու այլընտրանքը չկա։ Սամվել Կարապետյանը, Ռոբերտ Քոչարյանը, Գագիկ Ծառուկյանը, Անդրանիկ Թևանյանը, շատ ու շատ հասարակական, քաղաքական գործիչներ, Սրբազան հայրեր, գործարարներ, մշակույթի ներկայացուցիչներ, զինվորականներ գտնվում են տարբեր խափանման միջոցներում։ Նրանք գտնվում են ԱԱԾ մեկուսարանում և պահվում են հատկապես ընդդիմադիր գործիչների համար իշխանությունների կողմից ստեղծված խայտառակ, անմարդկային, անտանելի այնպիսի պայմաններում, որտեղից կամ այդ մարդուն պետք է տանել գերեզմանատուն, կամ լավագույն դեպքում, եթե փրկվելու շանս կա, հիվանդանոց։
Ընդդիմադիր ճակատը ձևավորված է, նորանոր ուժեր, քաղաքական գործիչներ միանում են շարժմանը։ Մենք կիրակի օրը հնարավորություն ունեցանք մեր հայրենակիցների տրամադրությունը շոշափելու նպատակով շփվելու քաղաքացիների հետ։ Ես հավաստիացնում եմ՝ հարյուրավորների հետ ենք հանդիպել, և այդ հարյուրավորների մեջ ընդամենը մի մարդ եղավ, որը երկակի տպավորության մեջ էր։ Մեր ժողովրդի ճնշող մեծամասնությունը պարզ հասկանում է, որ սա Ալիևի կողմից թելադրված օրակարգ է, Նիկոլ Փաշինյանն էլ սպասարկում է թշնամի պետության շահերը։
Կարդացեք նաև
«Ես»-ի գործոն այլևս չկա։ Կա «Մենք»-ի գաղափարը։ Սահմանը գծված է, որի մի կողմում Ալիևը, Էրդողանը, Փաշինյանը, ՔՊ-ն են, մյուս կողմում՝ պատվախնդիր հայ ժողովուրդը։ Պետք է վերջ տրվի ընդդիմադիր գզվռտոցներին, մեկը մյուսին բան ապացուցելուն։ Այլևս որևէ մեկը, եթե փորձի սեպ խրել, կոնսոլիդացիայի համար խնդիրներ ստեղծել, նա ուղղակի կսպասարկի Նիկոլ Փաշինյանի և ՔՊ-ի շահերը»,- ասաց Գառնիկ Դանիելյանը։
Աշոտ ՀԱԿՈԲՅԱՆ


















































