Դիետոլոգ Վարդանուշ Պետրոսյանի խոսքերով՝ շատերը մեր օրերում Մեծ պահքը օգտագործում են որպես նիհարելու, մաքրվելու, առողջանալու մեթոդ. «Իհարկե գովելի է, որ պահքը մտնում է մարդու կենսակերպ, սակայն մարդիկ պետք է ծանոթ լինեն դրա հոգեւոր կողմին»:
Այսօր լրագրողների հետ հանդիպման ժամանակ Վարդանուշ Պետրոսյանն ասաց, որ բժշկական տեսանկյունից ճիշտ է համարում այն փաստը, որ եկեղեցին արգելում է պահք պահել վատառողջներին, երեխաներին, ծերերին, հղի կանանց եւ կերակրող մայրերին, քանի որ այն կարող է վտանգավոր լինել իրենց առողջության համար:
Վ. Պետրոսյանի խոսքերով՝ դիետոլոգիական տեսանկյունից, մեծ պահքը՝ այսինքն բուսակերությունը, որը շարունակվում է 48 օր, ունի իր դրական եւ բացասական կողմերը: «Դրական կողմն այն է, որ սննդակարգից բացառվում են կենդանական ճարպերը, որոնք սիրտ-անոթային հիվանդությունների, շաքարային դիաբետի եւ ճարպակալման համար մեծ ռիսկ են հանդիսանում: Բուսամթերքն ավելի հարուստ է բջջանյութերով»:
Իսկ Մեծ պահքի բացասական կողմն էլ այն է համարում, որ առանց կենդանական ծագում ունեցող սննդամթերքի՝ բալանսավորված սննդակարգ ստանալ հնարավոր չէ. «Այս դեպքում կենդանական սպիտակուցների, վիտամին D 12-ի, վիտամին B-ի, հանքային աղերի՝ երկաթի եւ կալցիումի պակաս է լինում օրգանիզմում»:
Կարդացեք նաև
Խոսելով դիետայի մասին՝ Վարդանուշ Պետրոսյանը նշեց, որ բժշկական դիետան լրիվ տարբերվում է այլ մարդկանց առաջարկած կամ համացանցից ներբեռնված դիետայից:
«Բժշկական դիետան յուրաքանչյուր անհատի համար կազմված բալանսավորված սննդակարգ է, որը պետք է օրգանիզմի ֆիզիոլոգիական պահանջները բավարարելու համար՝ կախված տարիքից, ֆիզիկական ակտիվությունից եւ այլն»:
Նա նշեց, որ հասարակության մեջ ընդունված դիետաները այն մարդկանց համար են, ովքեր ունեն նիհարելու մոլուցք. «Այն խիստ սահմանափակ սննդակարգ է: Խոստանում են 15 կգ նիհարել ամսվա մեջ: Մինչդեռ ամսվա մեջ 2-3 կգ-ից ավելի նիհարել չի կարելի: Քաշը պետք է իջեցնել միշտ ուտելով եւ բալանսավորված սննդակարգով»:
Էլյա ՀՈՎՀԱՆՆԻՍՅԱՆ
