Ուկրաինայի ազգայնականների և ռուսամետ ակտիվիստների միջև մարտի 14-ի լույս 15-ի գիշերը Խարկովում բախումներ են տեղի ունեցել: Երկու հոգի կրակոցներից մահացել է: Ուկրաինայի ներքին գործերի նախարար Արսեն Ավակովը հայտնել է, որ բախումներին մասնակցած 30 հոգի ձերբակալվել է:
«Խարկովում ծայրահեղականների գիշերվա կրակոցների արդյունքը: Առավոտյան իրավիճակը խաղաղվել է: Բախման վայրում աշխատում են իրավապահները: Երկու կողմերից մոտ 30 հոգի ձերբակալվել է: Երկու հոգի սպանվել է, մի քանի հոգի վիրավորվել են, այդ թվում՝ ծանր վիրավորված է մեկ ոստիկան», – գրել է Ավակովը Ֆեյսբուքի իր էջում:
Լրատվամիջոցները նշում են, որ Ուկրաինայի կողմից ձերբակալվածները «Ուկրաինայի պատրիոտներ» կազմակերպության անդամներն են, որը մտնում է «Պռավիյ Սեկտոր» աջ ծայրահեղական խմբավորման մեջ:
Ուկրաինացի ազգայնականների և ռուսամետների միջև առճակատումը Խարկովում սկսվել է մարտի 14-ին, երբ ռուսամետ ակտիվիստները կոտրել են միկրոավտոբուսի ապակիները, որտեղ ենթադրաբար գտնվում էին ազգայնականները: Ավտոբուսը սկսել է շարժվել և ճանապարհին ռուսամետներից մեկին տակն է գցել:
Կարդացեք նաև
Պատրաստեց Հովհաննես ԻՇԽԱՆՅԱՆԸ
