Ղրիմի Բախչիսարայի բնակիչները բոյկոտում են թերակղզու կարգավիճակի վերաբերյալ հանրաքվեն:
Բախչիսարայի այն շրջաններում, որտեղ բնակվում են Ղրիմի թաթարները, ընտրական տեղամասեր չեն ստեղծվել: Այս մասին տեղեկացնում է censor.net.ua լրատվական կայքը:
Չնայած նրան, որ ՌԴ նախագահ Վլադիմիր Պուտինը խոստացել էր պաշտպանել Ղրիմում բնակվող թաթարների իրավունքները, սակայն նրանք որոշել են բոյկոտել եւ չմասնակցել հանրաքվեին: Ազատություն ռադիոկայանի ուկրաինական ծառայության փոխանցմամբ՝ Կրեմլը ամեն կերպ ցուցադրում է, որ Մեջլիսի եւ Ղրիմի թաթարների դիրքորոշումից է կախված իրավիճակը: Մարտի 12-ին Պուտինն ու Մեջլիսի նախկին ղեկավար Մուստաֆա Ջեմիլովը մոտ 30 րոպեանոց հեռախոսազրույց են ունեցել, որն էլ հենց Պուտինի «մեսիջն էր» թաթարների դերակատարության կարեւորության մասին:
Այնուամենայնիվ, Ղրիմի թաթարները հայտարարել են, որ հանրաքվեն անօրինական է, Ուկրաինայի տարածքային ամբողջականությունը չպիտի խախտվի:
Կարդացեք նաև
Նշենք, որ այսօր Ղրիմի թերակղզում նրա կարգավիճակի վերաբերյալ հանրաքվե է, ըստ որի բնակիչները պետք է որոշեն՝ միանա՞լ Ռուսաստանի դաշնությանը, թե մնալ Ուկրաինայի կազմում:
Նելլի ԲԱԲԱՅԱՆ
