Այսօր «Նիկոլ Աղբալյան» ուսանողական միությունը նախաձեռնել էր բողոքի ակցիա՝ ՄԱԿ-ի հայաստանյան գրասենյակի դիմաց՝ ի պաշտպանություն Քեսաբի հայերի: Երիտասարդները քննադատում էին անտարբեր միջազգային հանրությանը:
«Քեսաբը մենք ենք, մենք՝ Քեսաբինը»,- վանկարկում էին ներկաները:
«Ինչպես հարյուր տարի առաջ, բոլոր քաղաքակիրթ երկիրները, պետությունները շարունակում են նայել, բայց չցանկանալ տեսնել՝ ինչ է կատարվում Սիրիայի հանրապետության տարածքում, հայկական Քեսաբ քաղաքում եւ նրա շուրջ եղող հայկական գյուղերում»,- հայտարարեց հալեպահայ մի երիտասարդ:
Բողոքի ակցիային միացել էին Հայ օգնության միությունը, Հայ երիտասարդական միությունը, Հնչակյան կուսակցության երիտասարդական միավորումը:
«Նիկոլ Աղբալյան» միության նախագահ Հակոբ Հակոբյանը հայտարարեց, որ մինչեւ ՄԱԿ-ի հայաստանյան գրասենյակից չգան, իրենց գրավոր նամակը չտանեն, թեկուզեւ անձրեւին, շարունակելու են մնալ:
Սակայն ՄԱԿ-ի գրասենյակից ներկայացուցիչը շուտ եկավ: Նա խոսեց բողոքողներից Հակոբ Հակոբյանի հետ, ով տվեց իր ձեռքի նամակը եւ պնդեց, որ իրենք պահանջում են, որ ՄԱԿ-ը քննադատի Թուրքիայի կողմից հայահալած քաղաքականությունը եւ դա անի հրապարակային:
Կարդացեք նաև
ՄԱԿ-ի գրասենյակի ներկայացուցիչը խոստացավ, որ նամակը կփոխանցի ոչ միայն ՄԱԿ-ի հայաստանյան գրասենյակի ղեկավարին, այլ նաեւ Նյու Յորք:
Մանրամասները տեսանյութում:
Հռիփսիմե ՀՈՎՀԱՆՆԻՍՅԱՆ
