Այսօր հրավիրված մամուլի ասուլիսում օրերս Ֆինլանդիայի Վանտաա քաղաքում անցկացված Եվրոպայի առաջնությունից տուն վերադարձած ազատ ըմբշամարտի Հայաստանի ազգային հավաքականի գլխավոր մարզիչ Արայիկ Բաղդադյանը իր սաների մրցելույթները գնահատեց լավ:
Գլխավոր մարզիչը ընդհանուր առմամբ գոհ է արդյունքներից, թեեւ, նրա խոսքերով, որոշ քաշային կարգերում ինքն ըմբիշների ավելի հաջող մասնակցություն էր ակնկալում: «Տղաներն ընդհանուր առմամբ պատվով դուրս եկան: Դժգոհ եմ 61 կգ քաշային Նարեկ Սանոյանից: Նա վատ մասնակցեց եւ առաջին շրջանում պարտվելով՝ դուրս մնաց հետագա պայքարից: Մյուսները հանդես եկան իրենց հնարավորությունների սահմանում: Իսկ ընդհանրապես առանց մեր առաջատարի՝ աշխարհի ու Եվրոպայի գործող չեմպիոն Դավիթ Սաֆարյանի մասնակցության, որը վնասվածքի պատճառով չկարողացավ մեկնել Ֆինլանդիա, 1 արծաթե, 2 բրոնզե մեդալ նվաճելը եւ 31 երկրների մեջ թիմային 6-րդ տեղն զբաղեցնելը միանշանակ լավ ցուցանիշ է: Եթե Դավիթը մասնակցեր եւ առնվազն բրոնզե մեդալի արժանանար, մենք թիմային պայքարում կեզրափակեինք լավագույն եռյակը:
Կարեւոր է, որ ազատ ըմբշամարտում արդեն կայուն արդյունքներ կան եւ մենք հավասար պայքար ենք մղում ուժեղագույն այնպիսի երկրների հետ, ինչպիսիք են Ռուսաստանը, Բելառուսը, Թուրքիան, Ադրբեջանը, Բուլղարիան, իսկ Ուկրաինայի պես երկրից առաջ ենք անցնում», – ասաց գլխավոր մարզիչը:
Աշոտ ՀԱԿՈԲՅԱՆ
