Այսօր` ԵԽԽՎ գարնանային նստաշրջանի երրորդ օրը, Վեհաժողովի քննարկման թեման էին կիբեր անվտանգությանը, ինտերնետ հասանելիությանը վերաբերող հարցերը: Պատվիրակներ
Աքսել Ֆիշերի և Յանա Պելկոնեի զեկույցից հետո հարցեր հնչեցին բանախոսներին: ԵԽԽՎ-ում Հայաստանի պատվիրակության անդամներ, ՀՀԿ խմբակցության պատգամավորներ Նաիրա Կարապետյանն ու Արփինե Հովհաննիսյանն իրենց ելույթներում մտահոգություն հայտնեցին Թուրքիայի Կապի և հեռահաղորդակցության գերատեսչության կողմից երկրի տարածքում Թվիթերի միկրոբլոգների ծառայության հասանելիության արգելափակումը:
Հակադրելով Հայաստանում և Թուրքիայում այս ոլորտում գոյություն ունեցող իրավիճակը` Նաիրա Կարապետյանը շեշտեց, թե ինտերնետը պետք է հասանելի լինի բոլորին` անկախ ազգային պատկանելությունից, սեռից ու տարիքից: Հայ պատվիրակը ԵԽԽՎ ամբիոնից հայտարարեց, որ ՀՀ-ում ինտերնետ հասանելիությունը տարեցտարի աճում է: Այնուհետև իր խորը մտահոգությունը հայտնեց Թուրքիայում այս ոլորտում գոյություն ունեցող իրավիճակի վերաբերյալ: Այդ երկրի տարածքում Թվիթերի միկրոբլոգների ծառայության հասանելիության արգելափակումը նա համարեց ազատ կամարտահայտման իրավունքի ոտնահարում, ինչպես նաև քաղաքական դրդապատճառներ ունեցող փաստ: Այդ փաստը կապելով Թուրքիայում կայացած ընտրությունների հետ` Նաիրա Կարապետյանը նշեց, թե այս հանգամանքը հաշվի առնելով՝ պետք չէ զարմանալ Թուրքիայում կայացած ընտրությունների արդյունքով:
Արփինե Հովհաննիսյանը մտահոգություն հայտնեց, թե «ինտերնետը կարող է դառնալ զենք սխալ ձեռքերում: Ուստի պետք են կանոնակարգման մեխանիզմներ»:
Կարդացեք նաև
Վկայակոչելով Մարդու իրավունքների եվրոպական դատարանի` հոկտեմբերի 10-ին « Delfi AS-ն ընդդեմ Էստոնիայի» դատական գործի վճռով սահմանած այն դրույթը, որ կայքը կարող է պատասխանատվություն կրել ընթերցողների մեկնաբանությունների համար, որոնք պարունակում են վիրավորական արտահայտություններ, նշեց, թե իր համար ընդունելի չեն նման սահմանափակումները:
Հիշեցնենք, որ ԵԽԽՎ-ում այսօր սպասվում են նաև թեժ քննարկումներ Ուկրաինայում տեղի ունեցած իրադարձությունների վերաբերյալ, ինչպես նաև ԵԽԽՎ-ում ՌԴ պատվիրակության լիազորությունների դադարեցման վերաբերյալ:
Տաթև ՀԱՐՈՒԹՅՈՒՆՅԱՆ
