Այսօր խոսակցություններ են շրջանառվում, թե ՕԵԿ-ական նախարարների` հրաժարականի դիմում ներկայացնելուց հետո ՕԵԿ ղեկավար Արթուր Բաղդասարյանն էլ է Ազգային անվտանգության խորհրդի նախագահի պաշտոնից հրաժարականի դիմում ներկայացրել:
ՕԵԿ-ից չեն շտապում հստակ պատասխաններ տալ, միայն երեկ Հովհաննես Մարգարյանը չհերքեց այն փաստը, որ ՕԵԿ-ը որոշել է կոալիցիայից դուրս գալ:
Aravot.am-ը Պարույր Հայրիկյանի հետ զրույցում հետաքրքրվեց` իր գնահատմամբ ի՞նչ քաղաքականություն է վարում ՕԵԿ-ը: Նա համաձայնեց այն տեսակետի հետ, թե դրանք «խաղեր են» ու հավելեց. «Արդեն կա խորհրդարանական մեծամասնություն, և նա է որոշում, թե ում հետ ինչ խաղեր կշարունակի խաղալ: Դա նրա իրավունքն է: Այնպես որ, դրանից որևէ բան փոխվել չի կարող»:
Կարծիքներ հնչեցին, թե ՕԵԿ-ը «քվոտաների բազար է անում» այսօր էլ Հովհաննես Մարգարյանն ի պատասխան այս տեսակետների, գրավոր պատասխանով հանդես եկավ , թե «ՕԵԿ-ին առաջարկվել է 3 նախարարական պորտֆել»:
Կարդացեք նաև
Այս հարցերի վերաբերյալ Պարույր Հայրիկյանի կարծիքները պտտվում են խորհրդարանական մեծամասնության շուրջ. «Ովքեր դա գիտեն, նրանք դա գիտեն: Ինձ մի բան է հետաքրքրում, արդյոք ՕԵԿ-ն ունի՞ ինքնուրույնություն և ինքնուրույն կշիռ կարո՞ղ է ունենալ: Չգիտեմ` ինքնուրույնություն ունեն, թե ոչ, բայց ինքնուրույն կշիռ ունենալ չեն կարող, քանի որ կա խորհրդարանական մեծամասնություն, ու նրանք, ովքեր այդ մեծամասնության հետ հաճելի դիրքորոշում կցուցաբերեն, նրանց հետ էլ կաշխատեն»:
Տաթև ՀԱՐՈՒԹՅՈՒՆՅԱՆ
