Սյունիքի մարզի սահմանամերձ եւ բարձր լեռնային գոտում գտնվող Թանահատ գյուղում արդեն երկար ժամանակ է մշտական բնակիչներ չկան: Գյուղապետ Արսեն Օհանյանի խոսքով` ձմռան ամիսներին առատ տեղումների պատճառով գյուղի ճանապարհը փակվում է, պատասխանատուներն այն չեն մաքրում, մարդիկ էլ ստիպված տեղափոխվում են հարեւան գյուղեր, իսկ գարնան ու ամռան սեզոնին կրկին ժամանակավոր հաստատվում Թանահատում:
Գյուղապետի փոխանցմամբ` Սյունիքի մարզպետ Վահե Հակոբյանը համայնքներ կատարած այցելությունների ժամանակ եղել է նաեւ Թանահատում, ծանոթացել գյուղի պայմաններին եւ ներկայիս իրավիճակին ու խոստացել ուշադրության կենտրոնում պահել Թանահատը: «Թանահատն ունի հրաշալի բնակլիմայական պայմաններ մեղվաբուծությամբ, անասնապահությամբ, հողագործությամբ զբաղվելու համար: Պատրաստ ենք մարդկանց անվճար տներ, հողատարածք, խոտատեղ տանք, թող գան մեր գյուղում ապրեն, ոչ մի վարձ չենք վերցնելու, մեծ սիրով նրանց կընդունենք մեր գյուղում: Գյուղատնտեսությամբ զբաղվելու համար հիանալի վայր է Թանահատը, ոռոգման ու խմելու ջրով էլ է ապահովված»,- ասաց Թանահատի գյուղապետ Արսեն Օհանյանը եւ ցավով նշեց, որ 1990-ականներին այդպես էլ չհաջողվեց իշխանություններին համոզել նախկինում ադրբեջանցիներով բնակեցված այս գյուղի դպրոցը որպես հայկական դպրոց վերագործարկել: Դպրոցը փակվեց, եւ հայ երեխաներն այդպես էլ գյուղում կրթություն ստանալու հնարավորություն չունեցան: Տարեցտարի դպրոցահասակ երեխաներ ունեցող ընտանիքներն էլ հեռացան գյուղից` արտագաղթելով Ռուսաստան կամ հաստատվելով Սիսիան քաղաքում ու տարածաշրջանի գյուղերում:
Գյուղում հունիսի 8-ին համայնքի ղեկավարի ընտրություն է նշանակված: Գործող գյուղապետը տեղեկացրեց, որ անպայման առաջադրելու է իր թեկնածությունը եւ շարունակելու է պայքարել գյուղի վերաբնակեցման իր ծրագիրն իրականություն դարձնելու համար: Այս պահին գյուղում 64 մարդ կա գրանցված, որից 35-ն ընտրելու իրավունք ունի, եւ ընտրությունների ժամանակ տարածաշրջանում բնակվողները գալիս-մասնակցում են քվեարկությանը: Գյուղապետը նշեց, որ առաջիկա օրերին առաջադրելու է իր թեկնածությունը, իսկ այլ թեկնածուներ կլինե՞ն, թե՞ ոչ , տեղյակ չէ:
Սյունիքի մարզի թիվ 37 ԸԸՀ-ից տեղեկացանք, որ դեռեւս առաջադրվողներ չեն եղել:
Կարդացեք նաև
Մերի ՍՈՂՈՄՈՆՅԱՆ
Լուսանկարը՝ «Հետք»-ի:
