Բարձրաստիճան անձանց էթիկայի հանձնաժողովը ապրիլի 28-ին հրապարակել է ՀՀ նորանշանակ վարչապետ Հովիկ Աբրահամյանի ներկայացրած հայտարարագիրը, որի համաձայն դրամական միջոցները կազմում են 269 մլն դրամ եւ 1 մլն 940 հազար ԱՄՆ դոլար։ Հաշվետու տարում նրա եկամուտը կազմել է 41 մլն 110 հազար 330 դրամ (4մլն 110հազար 330 դրամը՝ պատգամավորի աշխատավարձ, 40 մլն դրամը՝ գյուղմթերքի իրացումից ստացված եկամուտ):
Նկատենք, որ բարձրաստիճան անձանց էթիկայի հանձնաժողով ներկայացրած հայտարարագրի մեջ լրացված են միայն դրամական միջոցները, իսկ մյուս բաժինները բաց են թողնված։
Եթե համեմատենք Հովիկ Աբրահամյանի ֆինանսական միջոցների վիճակն օրինակ վերջին 2 տարում, ապա պարզ կդառնա, որ նորանշանակ վարչապետի դրամապանակի հաստությանը աննշան բարակել է: Այսպես, 2012 թվականի մարտի 3-ին ԿԸՀ ներկայացրած հայտարարագրի համաձայն՝ նա «Անշարժ գույք» բաժնում հայտարարագրել է 3 բնակարան Երեւանում՝ 682 քմ ընդհանուր մակերեսով եւ 1 ավտոկանգառ՝ 18 քմ մակերեսով։ Շարժական գույք չի հայտարարագրել։ Հաշվետու տարվա եկամուտը՝ 43 մլն 484 հազ. 900 դրամ (3 մլն 484 հազար 900 դրամը՝ պատգամավորի աշխատավարձ, 40 մլն դրամը ՝ գյուղմթերքի իրացումից ստացված եկամուտ): Դրամական միջոցները հայտարարագիրը ներկայացնելու օրվա դրությամբ եղել են 290 մլն դրամ եւ 2 մլն 50 հազար ԱՄՆ դոլար։ Ստացվում է, որ երկու տարվա ընթացքում նա հարստացել է 21 մլն դրամով եւ աղքատացել 90 հազար դոլարով։ Ամբողջացնելու դեպքում կստանանք, որ միլիոնատեր Հովիկ Աբրահամյանի վրա ԱԺ նախագահի պաշտոնը լավ չի եկել՝ վերջինս աղքատացել է մոտ 49 հազար դոլարով։ Ավելին՝ եթե ուսումնասիրենք վարչապետ դարձած ԱԺ նախկին նախագահի կնոջ՝ Ջուլիետա Աբրահամյանի ֆինանսական կարողությունը, ապա պարզ կդառնա, որ նա զբաղված է ավելի եկամտաբեր գործով, քան իր ամուսինը, որովհետեւ իր դրամական միջոցները բացահայտորեն ավելի շատ են, քան երկրիս երրորդ դեմքինը։
Այսպես, ապրիլի 28-ին Բարձրաստիճան անձանց էթիկայի հանձնաժողով ներկայացրած հայտարարագրի համաձայն, բարձրաստիճան անձի կինն ամուսնու պաշտոն զբաղեցնելու պահին ունեցել է 300 մլն դրամ, 2 մլն 850 հազար ԱՄՆ դոլար, իսկ տարվա սկզբում նա ունեցել է 2 մլն դրամ եւ 50 հազար ԱՄՆ դոլար ավելի հայտարարագրած դրամական միջոցներ, քան այժմ։ Ստացվում է, որ Հովիկ Աբրահամյանի կինն իրենից հարուստ է 31 մլն դրամով եւ 910 հազար դոլարով։ Ջուլիետա Աբրահամյանի տարեկան եկամուտները նույնպես գերազանցում են ամուսնու եկամուտներին։ Նրա եկամուտները կազմել են 45 մլն դրամ, երբ նույն ժամանակահատվածում ամուսինը վաստակել է միայն 41 մլն 110 հազար 330 դրամ։
Կարդացեք նաև
Լիլիթ ԼԱԼԱՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
