ԱԺ պաշտոնական կայքից տեղեկանում ենք՝ մայիսի 6-ին ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը եւ հանձնաժողովի անդամները հանդիպեցին Հայաստանի Հանրապետությունում Չինաստանի Ժողովրդական Հանրապետության արտակարգ եւ լիազոր դեսպան Թիան Չանչունի հետ:
Արտակ Զաքարյանը բարձր գնահատեց Թիան Չանչունի ջանքերը` խորացնելու եւ ամրապնդելու հայ-չինական հարաբերությունները, ամենատարբեր ոլորտներում արդյունավետ համագործակցությունը: Անդրադառնալով երկկողմ հարաբերություններին՝ Արտակ Զաքարյանը նշեց, որ կա չօգտագործված մեծ ներուժ միջխորհրդարանական հարաբերությունները զարգացնելու ուղղությամբ: Կողմերը կարեւորեցին նաեւ երկու երկրների տարբեր քաղաքների միջեւ համագործակցության զարգացման եւ խորացման անհրաժեշտությունը:
Հանդիպման ընթացքում հայ խորհրդարանականները ներկայացրին Չինաստան կատարած այցի տպավորությունները: Արտակ Զաքարյանը համոզմունք հայտնեց, որ փոխադարձ այցերը նոր ազդակ են հաղորդում երկկողմ հարաբերությունների զարգացմանը:
Զրուցակիցները պատրաստակամություն հայտնեցին աջակցելու երկկողմ հարաբերությունների ամրապնդմանը, քննարկեցին համագործակցությանը վերաբերող այլ հարցեր եւս:
