«Մինասյան Վահագի դատական գործը բավարարելը և փոխհատուցելը, իմ կարծիքով` դատարանի սովորական «PR» էր. չեմ կարծում, որ մնացածն այդպիսի արձագանք կստանան»,-Aravot.am-ի հարցին` հնարավո՞ր է քաղաքացիական ակտիվիստ Վահագն Մինասյանի հայցի` ընդդեմ ոստիկանության բավարարումը նախադեպային լինի և բավարարվեն իր ու իր ընկերների դեմ դատական հայցերի առնչությամբ հակընդդեմ հայցերը, այսպես պատասխանեց քաղաքացիական ակտիվիստ Սիփան Փաշինյանը:
Հիշեցնենք, որ այսօր ՀՀ վարչական դատարանում քննվեց ՀՀ ոստիկանության հայցն ընդդեմ Սիփան Փաշինյանի:
Սիփան Փաշինյանը, շարունակելով դատարանի և ոստիկանության վարած քաղաքականության թեման` ասաց. «Պատասխանատվության ենթարկված իմ ընկերների գործերը ոստիկանությունը փորձում է կարճել, հետո հակընդդեմ հայցով չեմ կարող ասել դատարանը բոլորին կբավարարի՞, թե` ոչ: Մեր փաստաբաններն անում են ամեն ինչ, որ մեր կողմից հակընդդեմ հայցը ոստիկանությանը, բավարարվի դատարանի կողմից: Բայց չեմ կարծում, որ Մինասյան Վահագի գործի բավարարումը նախադեպ կհանդիսանա. կբավարարվի ևս երկու, երեք գործ, իսկ մնացածը` ոչ»:
Գնահատական տալով դատաքննության ընթացքին`Սիփանը մեզ հետ զրույցում նշեց, թե «օրվա դատաքննությունից կողմնակալություն է նկատում» ու մանրամասնեց. «Իմ պաշտպանները փորձում են օրենքի կետեր ներկայացնել, որոնցով դատարանը պետք է հայցը բավարարի, բայց դատարանը ոչ մի կերպ չի ուզում ընդունել, քանի որ ըստ տրամաբանության` դա ոստիկանությանը ձեռնտու չէ, և փորձում է ամեն կերպ խուսափել այնպիսի օրենքներ ընդունել և դատաքննությունում քննել, որոնք վնասում են ոստիկանությանը»:
Տաթև ՀԱՐՈՒԹՅՈՒՆՅԱՆ
