Հունիսի 11-ին ՀՀ ՆԳՆ ոստիկանության Բազումի բաժնի պետ, ոստիկանության փոխգնդապետ Ա.Հարությունյանին զեկուցագրով դիմում է Բազումի բաժնի համայնքային ոստիկան, լեյտենանտ Դ.Մկրտչյանը, հայտնելով, որ հունիսի 7-ին «Իշխանություն» լրատվական կայքում հրապարակվել է, որ 23/11, 23/12 ընտրատեղամասերում նույն անձը զինվորական համազգեստով քվեարկել է երկու անգամ: Պարզվել է՝ Սևադա Սարգսյանն այցելել է Վանաձորի 24 դպրոցի տարածքում գտնվող 23/11 տեղամաս, մոտեցել հանձնաժողովին, սակայն այնտեղ հայտնել են, որ կարող է քվեարկել 23/12 -ում, քանի որ նրա անձնական տվալները ներկայացված են այդ ընտրատեղամասում, որից հետո Սևադա Սարգսյանը գնացել է նշված տեղամաս, կատարել քվեարկելություն: Համայնքային ոստիկանը «Կատարված ստուգումներով հանցանքի կամ վարչական իրավախախտման առերևույթ հատկանիշներ մատնանշող փաստական տվյալներ չէր ստացել», նա խնդրել էր բաժնի պետի կարգադրությունը:
Մեկ այլ զեկուցող՝ կապիտան Ա. Վիրաբյանի զեկուցագիրն էլ, որն ուղարկվել էր ջնջումներով «Առավոտ», 23/12 ընտրատեղամասի հանձնաժողովի նախագահը` Ջուլետտա Սարգսյանը հայտնել էր, որ կրկնակի քվեարկող զինվորական չի եղել իրենց ընտրատեղամասում, ընտրախախտում չի արձանագրվել նշյալ ժամին:
Սևադա Սարգսյանը դիմել է Լոռու մարզի առաջին ատյանի ընդհանուր իրավասության դատարան`«Պատվին, արժանապատվությանը և գործարար համբավին պատճառված վնասի հատուցման պահանջի մասին» հայցով:
Պատասխանողներ են ճանաչվել «Իշխանություն.ամ», «Երկիր. ամ», «Առավոտ.ամ», «Հրապարակ.ամ», «Շամշյան.ամ» կայքերը:
Կարդացեք նաև
Հայցվորը նշել է, որ ՊՆ զորամասի զինծառայող է, խմբի հրամանատար է, ունի ավագ լեյտենանտի կոչում:
Նա նշել էր, որ ընտրության օրը մեկ անգամ է քվեարկել, սակայն «Իշխանություն.ամ»-ում տպագրվել է, թե քվեարկել է երկու անգամ: Այդ տեղեկությունները տարածել են այլ լրատվական կայքեր. «Տեղեկատվությունն ուղեկցվել է լուսանկարներով, ձայնագրություններով, որտեղ հայցվորս հստակ տեսանելի եմ և ճանաչելի: Արդյունքում հիշյալ, իրականությանը չհամապատասխանող, հայցվորիս ճանաչելի դարձնող լուսանկարներով ուղեկցվող տեղեկատվությունը ստացել է շատ մեծ տարածում: Բազմաթիվ օգտատերեր/ընթերցողներ/ կատարել են բազմաթիվ վիրավորական մեկնաբանություններ և արտահայտություններ, ստացել եմ բազմաթիվ հեռախոսազանգեր բարեկամ-ծանոթներիցս, անգամ նման դեպքով հետաքրքրվել են ՀՀ պաշտպանության նախարարությունից և այլ պետական ծառայություններից»:
ՀՀ ոստիկանությունից նույնպես հետաքրքրվել են, նա զրուցել է Բազումի բաժնի ոստիկանների հետ, կազմվել են համապատասխան նյութեր, քրեական վարույթ չի հարուցվել:
Հայցվորը նշել է, որ ակնհայտ սխալ տեղեկատվությունը տարածվելուց հետո ինտերնետային կայքերը չեն հերքել, արդյունքում, ինքը ընկալվում է մինչ օրս որպես ընտրական կեղծիք կատարած անձ:
Հայցվորը պահանջում է համապատասխան, պատշաճ հերքում, կրկնակի ընտրություն արարքը կատարած չլինելու վերաբերյալ, այն հրապարակելով այնպես, որ սկզբնական տեղեկատվության հետ միաժամանակ արտացոլվի հերքում:
Հայցվորը պատասխանողներից պահանջում է վեց միլիոն դրամ փոխհատուցման գումար, ինչպես նաև պետական տուրքի գումարը:
Ռուզան ՄԻՆԱՍՅԱՆ
«Առավոտ» օրաթերթ
09.07.2026
