Այսօր խորհրդարանում ՀՀ կառավարության աշխատակազմի ղեկավար-նախարար Դավիթ Հարությունյանը լրագրողների հետ զրույցում փորձեց պարզաբանել, թե ի՞նչ է նշանակում վարչապետի արած հայտարարությունը`պարտադիր կուտակայինի մասով`«պարտադիր, բայց ոչ պարտադրված»: «Պարտադիր» նշանակում է, որ պարտադիր լուծումներ պետք է գտնվեն, իսկ «չպարտադրված» նշանակում է, որ պետք է գտնվեն այնպիսի լուծումներ, որոնք յուրաքանչյուրին՝ անգամ երիտասարդին ցույց տան, որ իր համար դա ճանապարհ է»,- պարզաբանեց Դավիթ Հարությունյանը: «Այսինքն` նա պետք է համաձայն ու համոզված լինի դրանում, որ դա է ճանապարհը, և դա ողջամիտ ճանապարհ է: Կարծում եմ`այս երկու կոմպոնենտների մասին է խոսում վարչապետը` ասելով «պարտադիր, բայց ոչ պարտադրված»,- հավելեց նա:
Դավիթ Հարությունյանը գտնում է, որ լրագրողներին պետք է հետաքրքրի այս բառերի ոչ թե տարբերությունը, այլ` նմանությունը:
Առավել հանրամատչելի, Դավիթ Հարությունյանն այսպես բացատրեց այդ բառերի էությունը`կառավարությունը պետք է գտնի լուծում, որպեսզի հետագայում` մեր երկրի ժողովրդագրական փոփոխվող պատկերի պարագայում ստեղծի պայմաններ, որ Հայաստանի կենսաթոշակառուները չհայտնվեն աղքատության շեմին: Այնուհանդերձ, նա դժվարացավ բացահայտել լուծման մոդելները, քանի որ դրանք դեռ քննարկման փուլում են:
«Եթե որևէ մեկն ուշադիր ուսումնասիրել է Սահմանադրական դատարանի որոշումը, կտեսնի նաև, որ գործատուի պատասխանատվությունը ևս պարտադիր պետք է լինի, ի՞նչ մոդելով, դեռևս վաղ է խոսելը»,-հայտարարեց Դավիթ Հարությունյանը:
Կարդացեք նաև
Նելլի ԳՐԻԳՈՐՅԱՆ
