«Որքան էլ Հովիկ Աբրահամյանը պնդի, թե իր ներկայացրած կադրերն են, որ Սերժ Սարգսյանն էլ հաստատել է, միևնույն է, կարծում եմ, որ դրանք համատեղ նշանակված կադրեր են»,-«Մեդիա կենտրոնի» նախաձեռնած «ՀՀ նոր կառավարության ծրագիրը. լուծումնե՞ր, թե՞ ցանկություններ» թեմայով բանավեճի ընթացքում այսպիսի կարծիք հայտնեց ՀԱԿ խմբակցության պատգամավոր Լյուդմիլա Սարգսյանը:
Նա նշեց, եթե ամենալավ ծրագիրն էլ կառավարությունը ներկայացներ ԱԺ, ապա կառավարությունն այսօր ունակ չէ կյանքի կոչել այն, քանի որ կառավարությունը բացարձակ անկախ չէ:
Այնուհետև վրդովվեց. «Ինչպե՞ս կարելի էր ՊԵԿ նախագահին նշանակել ֆինանսների նախարար: Բյուջե մուտքի ու ելքի ապահովողը դառնում է մեկ մարդ, որից չգիտեմ` ինչ կերպ է ժողովուրդը հաշվետվություն պահանջելու: Չէ՞ որ կոռուպցիայի համար դրանք մեծ հիմքեր են: Քանի դեռ իշխանությունն իր մեջ քաջություն չի գտնում ու հետադարձ հայացք գցում իր գործունեության վրա, կառավարությունը չի հնչեցնում իր գնահատականներ նախկին կառավարության բացթողումների, չարաշահումների մասին, այս նորաստեղծ կառավարությունը գնալու է նույն ճանապարհով»:
Այնուհետև շարունակեց. «Մեր երկրում արդեն վաղուց ավանդույթ է դարձել, որ ով ինչ ուզում անում է, առավել ևս իշխանությունը, հետո որևէ մեկը դրա համար պատասխանատվություն չի կրում: Ձախողել եք տնտեսական քաղաքականությունը ի դեմս Տիգրան Սարգսյանի, որին ամեն կերպ պաշտպանում էր ՀՀԿ-ն, նրա բոլոր ֆիքս իդեաներին կողմ էինք քվեարկում: Եթե չեք կրում պատասխանատվություն նախկին կառավարության բացթողումների համար, ինչպե՞ս կարող ենք մենք հավատալ հաջորդ կառավարությանը»:
Կարդացեք նաև
ՀՀԿ խմբակցության քարտուղար Հովհաննես Սահակյանը հակադարձեց. «Դե ազգային ժողովի քաջերը դուք եք»:
Այնուհետև հարցրեց` այդ դեպքում դեմ քվեարկեիք կառավարության ծրագրին, ոչ թե չմասնակցեիք: Լյուդմիլա Սարգսյան հակադարձեց, թե նույնն է` ինչ դեմ ու հավելեց. «Մենք հայտարարել ենք, որ դեմ ենք»:
Հովհաննես Սահակյանը ասաց, թե «եկել ենք ձեր դուռը», ասում ենք առաջարկներ ներկայացրեք, ինչու չներկայացրիք: Տիկին Սարգսյանը, թե «առաջարկը կարող է ընդունվել, հետո կյանքի չկոչվել, ժողովրդի վստահության խնդիր է»:
Հովհաննես Սահակյանը պատասխանեց. «Ժողովրդի անունից խոսելուց առաջ պետք է նախ այդ ժողովրդի համամասնության վստահությունը վայելելու չափ կարողանաք խոսել»: Լյուդմիլա Սարգսյանն առաջարկեց այդ դաշտ չանցնել: Հովհաննես Սահակյանը` «Բոլոր այդ թեմաները գալիս են այդտեղից»:
Հարց հնչեց, թե այդ ինչպե՞ս է` ՀԱԿ խմբակցությունից Հրանտ Բագրատյանը դրական է արտահայտվում կառավարության ծրագրի մասին, տիկին Սարգսյանը արձագանքեց. «Հրանտ Բագրատյանի մոտեցումները ՀԱԿ-ը չի կիսում»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա» կենտրոնի
