Հայաստանում Քուվեյթի արտակարգ և լիազոր դեսպան Բասսամ Մուհամմադ ալ-Քաբանդիի տանը այսօր կայացավ բարեգործական ճաշկերույթ, որից ստացված հասույթը կուղղվի «Օրրան» բարեգործական կազմակերպության շահառուների կարիքներին: Միջոցառմանը ներկա էին դիվանագետներ՝ մասնավորապես՝ Հնդկաստանի ու Բրազիլիայի դեսպանները, գործարարներ, արվեստի, շոու-բիզնեսի ու այլ ոլորտների ներկայացուցիչներ:
Մասնակիցները վճարել էին բարեգործական ճաշկերույթի համար նախատեսված տեղերի համար: Այդ նպատակով ազգային խորտիկները պատրաստել էր դեսպանի տիկինը: «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը, «Օրրանի» գոգնոցը կապած, իր ձեռքով խորոված պատրաստեց: Նրան օգնում էր սիրված դերասան Աշոտ Ղազարյանը: Հանրահայտ հյուրերն այնքան «տաքացան», որ անգամ շուրջպար բռնեցին՝ հայկական ազգային երգի հնչյունների ներքո:
Հիշեցնենք, որ «Օրրան» բարեգործական կազմակերպությունը հիմնադրել են Արմինե եւ Րաֆֆի Հովհաննիսյանները: «Օրրանն» իր առջեւ նպատակ է դրել պայքարել Հայաստանում աղքատության եւ երեխաների շրջանում մուրացկանության տարածման դեմ:
Գոհար ՀԱԿՈԲՅԱՆ
Կարդացեք նաև
