Լրահոս
Օրվա լրահոսը

Հայաստանում հոսանքի սակագինը բարձրացավ, որ Ռուսաստանն ավելի շա՞տ գազ վաճառի (Տեսանյութ)

Հունիս 12,2014 15:55 Share
Աջակցեք aravot.am-ին

«Փաստորեն, մասնագետների հաշվարկը գնագոյացման հետ կապված չի ընդունվում: Ուղղակի կոմերցիոն ընկերությունն ասում է`ունեմ ճեղքվածք, և դա պետք է փակվի սպառողների հաշվին»,-Aravot.am-ի հարցին` հերթական անգամ հարվածեցին սպառողի գրպանին` բարձրացնելով հոսանքի սակագինը, նոր կառավարությունից է՞լ ինչ ակնկալել, այսպես արձագանքեց նորացված ՀՀՇ անդամ Հովհաննես Իգիթյանը:

Նա, համաձայնեց այն կարծիքին, թե տարօրինակ է, որ նման ճեղքվածք է առաջանում այն ընկերության մոտ, որն ունի երաշխավորված սպառում: Այնուհետև փաստեց, թե այս ձմեռ ՀՀ բնակիչների շրջանում ավելացել է էլեկտրաէներգիայի սպառումը:

Մեր դիտարկմանը, փաստորեն հոսանքի սակագնի բարձրացումը կամայակա՞ն մոտեցում էր, պարոն Իգիթյանն արձագանքեց. «ՀՀ-ում այս կիսապետական կամ պետական մենաշնորհ ունեցող ընկերությունները, մանավանդ ՌԴ-ի հետ կապված, բիզնեսով են զբաղվում: Այդ ինչպե՞ս եղավ, որ սահմանին նույն ընկերությունը որն արդեն ռուսական է` «ՀայՌուսգազարդը», գազը մի գնով էր գնում և այլ գնով վաճառում ոչ թե այլ ընկերության, այլ բնակիչներին: Ոչ մի անգամ չեմ տեսել, որ հակամենաշնորհային մեր հանձնաժողովը սպառողների շահերից խոսի»:

Ճեղքվածքի փաստը պարոն Իգիթյանի համար կասկածելի է: Նա այս առիթով ասաց. «Դա նշանակում է, որ առնվազն իրենց վատ մենեջմենթի, սխալ հաշվարկների, շքեղ աշխատավարձերի, մեքենաների, կահույքի և ներքին ծախսերի պատճառով մենք` սպառողներս ենք տուժում, քանի որ այդ բոլոր ծախսերը նստում են մեզ վրա: Ես չեմ ասում, որ այնտեղի աշխատակիցները պիտի ապրեն ՀՀ` աղքատության շեմին գտնվող քաղաքացիների պես, բայց գոնե իրենց ծախսերը համապատասխանեցնեն հայկական ընկերության միջին ծախսերին: Սա արհամարհական է ՀՀ քաղաքացու նկատմամբ: Այնտեղ տարբեր մարդիկ, նաև մեր պաշտոնյաները, ուղղակի և անուղղակի կերպով գումարներ են ստանում: Եթե նայենք, թե ինչպես են նրանք ներգրավված այս բիզնեսի հետ առնչվող ընկերություններում, ապա կտեսնենք, որ շահագրգռված են»:

Պարոն Իգիթյանը հոսանքի սակագնի բարձրացման հարցում նաև քաղաքական ենթատեքստ է տեսնում ու նշում. «Այս ձմեռ գազի բարձր սակագնի պատճառով շատ սպառողներ իրենց ջեռուցումը գազից փոխել են էլեկտրաէներգիայի : Ուստի գազի սպառումը նվազել է: Չեմ բացառում, որ էլեկտրաէներգիայի սակագինը բարձրանում է`հաշվի առնելով այն, որ Ռուսաստանը այս տարի պիտի ավելի շատ գազ վաճառի»:

Տաթև ՀԱՐՈՒԹՅՈՒՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (1)

Պատասխանել

  1. Hayk says:

    ՀՀՇ-ի իշխանության տարիներին, երբ հոսանքի գին@ բարձրացրեցիք այնքան,որ ԱՊՀ տարածքում ամենաբարձրն էր, ասում էիք «սա միջազգային նդունված գին է,պարոնայք,ինչու եք բողոքում»? Մոռացաք??! Այն ժամանակ մենք տաս անգամ քիչ աշխատավարձ ու թոշակ էինք ստանում(((((((