«Մեզ համար ամենասկզբունքային երեք խնդիր կա կուտակայինի հետ կապված. մենք համարում ենք կուտակային այս ռեֆորմի պարտադիր բաղադրիչն անընդունելի`որեւէ տեսքով`քողարկված, ոչ քողարկված, ինչ-որ մի կատեգորիաների վրա տարածվող եւ այլն»,-քառյակի`ՀԱԿ, ԲՀԿ, ՀՅԴ եւ «Ժառանգություն», նիստի ընդմիջմանը լրագրողների հետ զրույցում ասաց ՀԱԿ խմբակցության ղեկավար Լեւոն Զուրաբյանը:
Քառյակն այսօր հավաքվել է քննարկելու պարտադիր կուտակային կենսաթոշակային համակարգին վերաբերող կառավարության ներկայացրած նոր նախագիծը, որը շաբաթ օրը ներկայացվել էր խորհրդարանական խմբակցություններին: Այն ենթադրում է, որ «պարտադիր կուտակայինն» այլեւս պարտադիր հարկատեսակ է դառնալու:
«Բացառում ենք խտրականությունը: Այն ժամանակ երկու կատեգորիա կար, հիմա արդեն երեք կատեգորիա են մտցրել»,-երկրորդ վերապահումը բարձրաձայնեց Լեւոն Զուրաբյանը`հավելելով, որ երրորդ վերապահումն էլ վերաբերում է սերունդների համերաշխությանը. «Մեզ համար գործելու է սերունդների համերաշխության սկզբունքը»:
Այժմ այս եւ այլ հարցերը քառյակը կշարունակի քննարկել «Դեմ եմ» նախաձեռնության անդամների հետ, ովքեր ցանկություն էին հայտնել մասնակցել քառյակի նիստին:
Դիմելով լրագրողներին`ՀԱԿ խմբակցության քարտուղար Արամ Մանուկյանն էլ հումոր արեց. «Ավելի լավ է դուք կամավոր լքեք աշխատասենյակը, քան պարտադրված»:
Կարդացեք նաև
Այլ մանրամասները`նիստի ավարտից հետո:
Նելլի ԳՐԻԳՈՐՅԱՆ
