ՀԿԿ կենտրոնական կոմիտեի քարտուղարի կարծիքով՝
Զվարթնոցի տաճարում տեղի ունեցածը արտասահմանից ներմուծված այլանդակությունների արդյունք է:
Օրերս Զվարթնոցի տաճարում 700.000 դրամ արժեցած կորպորատիվ միջոցառումը ՀԿԿ կենտրոնական կոմիտեի քարտուղար, ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանի կարծիքով՝ դատապարտելի է:
«Այս ամենը երկաթյա վարագույրի բացվելու արդյունք է: Սա արտասահմանից ներմուծված այլանդակությունների, ազատությունների հերթական շարքն է` իր հետեւանքներով: Խորհրդային միության ժամանակ այդ վարագույրը փակ էր, ոչ մի ճանճ անգամ չէր մտնում սահմանից այն կողմ, ժողովուրդն էլ ապրում էր շատ հանգիստ, շատ նորմալ: Այսօր, սակայն, բոլոր դարպասները բացել ենք, եւ ինչ այլանդակություն կա, ներմուծվում է Հայաստան»,- տեղի ունեցածի վերաբերյալ «Առավոտի» հետ զրույցում կարծիք է հայտնում Անդրանիկ Ղուկասյանը:
Նա անթույլատրելի է համարում նման երեւույթները եւ նկատում է, որ պետությունն այստեղ լուրջ անելիք ունի:
Կարդացեք նաև
«Ես գտնում եմ, որ այս դեպքում պետությունը պետք է միջամտի եկեղեցու գործերին, որովհետեւ եկեղեցի գնացողը մեր պետության ժողովուրդն է: Այստեղ բարոյականության հարց կա, մատաղ սերնդի դաստիարակության հարց կա, պետությունը պետք է միջամտի, որ այսպիսի այլանդակություններ չլինեն»,- ասում է Անդրանիկ Ղուկասյանը:
ԱՆՈՒՇ ԲՈՒԼՂԱԴԱՐՅԱՆ
«Առավոտ» օրաթերթ
21.06.2014
