«Նոր մարտահրավերը, որ ազդում է ղարաբաղյան հիմնախնդրի վրա, դա նոր ձևաչափն է Արևմուտքի և Ռուսաստանի հետ հարաբերությունների: Այդ ձևաչափը իրականություն է դառնում վերջին ամիսների ընթացքում»,-այսօր «Տեսակետ» մամուլի ակումբում հայտարարեց Երևանի մամուլի ակումբի նախագահ Բորիս Նավասարդյանը:
Ըստ նրա՝ հիմնական հարցն այն է, թե ինչպես կկարողանա Ռուսաստանը այս զարգացումների համատեքստում Ադրբեջանի հետ հարաբերություններ կազմակերպել: Բորիս Նավասարդյանը նկատեց. «Մեզանում շատ են մարդիկ, որոնք անվերապահորեն հավատում են, թե Ռուսաստանը երբեք ՀՀ շահերին հակառակ չի վարվի: Բայց եթե հաշվի առնենք այն, որ Ռուսաստանն առաջինն իր շահերին համապատասխան է գործելու, ապա հիշողություն է առաջանում, թե ինչ է տեղի ունեցել պատմության ընթացքում: Բայց ամեն ինչ իրականացվելու է այնպես, ինչպես բխում է նոր ձևավորվող միավորի շահերից»:
Հարցին՝ ՀՀ-ի Մաքսային միությանն անդամակցության գործընթացը կարելի՞ է տապալված համարել՝ հաշվի առնելով այն հանգամանքը, որ հուլիսի 3-ի հանդիպումը հետաձգվեց, ՀՀ վարչապետ Հովիկ Աբրահամյանը հայտարարեց, թե ձգձգման պատճառների մասին հայկական կողմը չգիտի: Բորիս Նավասարդյանը պատասխանեց. «Նախաձեռնությունը ամբողջությամբ տապալված չէ, քանի որ համաձայնագիր ստորագրված է»:
ՀՀ-ի անդամակցության ձգձգման պատճառներին անդրադառնալով՝ Բորիս Նավասարդյանը նշեց. «Մեկը Հայաստանի՝ Առևտրի համաշխարհային կազմակերպությանն անդամակցումն է: Սա ենթադրում է, որ Հայաստանը կամ պետք է փոխհատուցի այն կորուստները, որոնք ունենալու են տարիֆների բարձրացման արդյունքում բոլոր ԱՀԿ անդամ երկրները: Չգիտեմ՝ ինչքանով է ՀՀ-ն տիրապետում այդ ռեսուրսներին, որ այդ փոխհատուցումները ապահովեն: Իսկ եթե չեն փոխհատուցում, ի՞նչ է լինում ՀՀ-ի անդամակցության հետ: ՀՀ-ի անդամակցությունը Եվրասիական տնտեսական միությանը նույն փաթեթում է գտնվում, ինչ Ռուսաստան-Ադրբեջան հարաբերությունները: Ադրբեջանը, բնականաբար, որպես նախապայման դնելու է Ղարաբաղի հարցի լուծում: Այսօր ՀՀ-ի ձայնը ավելի քիչ լսելի է, քանի որ համարվում է, որ Հայաստանի հարցը լուծված է, Ադրբեջանի հարցը դեռ պետք է լուծվի»:
Տաթև ՀԱՐՈՒԹՅՈՒՆՅԱՆ
Հայեր, ոչ մի տեղ մի մտեք,պետք չէ, ոչ ոքի պետք չեք, ավելի լավ է ԱԱԾ մտեք կամ սերժօվշոր ու կառավարություն, գոնե ինքներդ ձեզ մի քիչ պետք կգաք: