Գյուղնախարար Սերգո Կարապետյանն, այսօր շրջելով Շիրակի մարզի կարկտից տուժած գյուղերը ու լսելով բնակիչների բողոքները, լրագրողներին տված հարցազրույցում ասաց, որ վնասի չափերը, ըստ տնտեսությունների, կարձանագրեն ու կաշխատեն, անպայման, լուծում տալ կառավարությունում:
Նախարարը թվարկեց, թե ինչ տեսակի աջակցություն են պատրաստվում ցույց տալ գյուղացիներին. «Առաջին հերթին` մարդիկ վարկեր են վերցրել, պիտի երկարացվեն այդ վարկերի ժամկետները, երկրորդ հերթին, որ աշնանացանի համար իրենք անցած տարի պետական ծրագրով էլիտային և առաջին վերարտադրության սերմեր են ստացել ցորենի, գարնանը գարի են ստացել, կաշխատենք դրանց վերադարձի հարցը լուծել և 3-րդ՝ աշնանացանի համար իրենց սերմեր տրամադրել»:
Գյուղացիները միջամտեցին հարցազրույցին `հարցնելով, թե հողի հարկը չի՞ զիջվի այս դեպքում, գյուղնախարարը նշեց, որ, ըստ իրավիճակի, այս հարցը ևս կներկայացնի վարչապետին:
Սերգո Կարապետյանը խոսեց նաև ցանցային պաշտպանությունից` օրինակ բերելով եվրոպական երկրների փորձը: Ըստ նրա, Եվրոպայի առաջատար երկրներում այլևս հակակարկտային կայաններ չեն օգտագործում, այլ ցանցային պաշտպանություն են իրականացնում, որը թեև թանկ հաճույք է, սակայն 100 տոկոսնոց է արդյունավետությունը:
Կարդացեք նաև
Ըստ նախարարի, Հայաստանում խաղող մշակողներն ու պտղատու այգիներ ունեցողներն արդեն անցել են ցանցային եղանակի, քանի որ հակակարկտային կայանի պաշտպանությունը`60-70 տոկոս է: Բացի այս, Սերգո Կարապետյանի ասելով, այս տարվանից աստիճանաբար մտցնելու են ապահովագրական համակարգ նաև գյուղատնտեսության ոլորտում, որպեսզի գյուղացին ապահովագրի իր բերքը:
Այն հարցին էլ, ինչու գյուղացիների մոտ անվստահություն կա կառավարության հանդեպ, նախարարը համաձայնեց, որ իրոք նկատել է անվստահություն, սակայն նշեց, որ կառավարությունը դեռ նոր է, նոր կաբինետ է, և ամեն ինչ կանեն այդ վստահությունը վերականգնելու համար:
Մանրամասները` տեսանյութում
Նունե ԱՐԵՎՇԱՏՅԱՆ
