«Գասպաչոն» լոլիկով իսպանական սառն ապուր է: Կախված այն բանից, թե որտեղ եւ ում կողմից է պատրաստվում Գասպաչոն, նրա բաղադրությունը կարող է փոփոխությունների ենթարկվել, սակայն անփոխարինելի է մի բան՝ լոլիկը: Առաջարկում եմ Գասպաչոյի ամենատարածված տարբերակներից մեկը:
Անհրաժեշտ մթերքները
Լոլիկ- 2 կգ
Սոխ-1 հատ
Կարդացեք նաև
Սխտոր-4-5 պճեղ
Կանաչ թարմ պղպեղ-1 հատ
Կանաչ կծու ծիծակ-1 հատ (եթե կծվի սիրահար չեք, բաց թողեք այս պահը)
Վարունգ-1- 2 հատ (պարտադիր չէ)
Նեխուր (քարավուզ) – 3-4 ճյուղ
Գինու կարմիր քացախ- 2 ճաշի գդալ
Ձիթապտղի յուղ- 2-3 ճաշի գդալ
Աղ- 1 թեյի գդալ (աղի փոխարեն կարող եք ավելացնել 2 ճաշի գդալ սոյայի սոուս)
Սեւ եւ կարմիր պղպեղ
Պատրաստման եղանակը
Լոլիկների վրա՝ տակի մասից, խաչաձեւ կտրվածք արեք՝ միայն կեղեւը: Ապա դրեք մեծ ամանի մեջ, վրան լցրեք հենց նոր եռացրած ջուր: 5-6 րոպեից կեղեւահան արեք: Խաչաձեւ կտրվածքը հեշտացնում է կեղեւահանման պրոցեսը:
Մինչ լոլիկները եռման ջրի մեջ են, կտրատեք մյուս բանջարեղենները՝ սոխը, սխտորը, վարունգը, պղպեղը, նեխուրի ցողունները (տերեւները թողեք զարդարելու համար), եւ լցրեք բլենդերի մեջ:
Լոլիկները կեղեւահան անելուց հետո կտրատեք 4-5 մասի, նույնպես լցրեք բլենդերի մեջ: Միացրեք բլենդերը, լավ հարեք, մինչեւ դառնա միատարր զանգված:
Ավելացրեք աղը, սեւ եւ կարմիր պղպեղները, քացախն ու ձեթը, մի անգամ էլ հարեք եւ լցրեք կաթսայի կամ ապուրամանի մեջ ու դրեք սառնարան: Այս ապուրը պետք է լավ սառը լինի ու ցանկալի է լավ կծու: Այն շատ լավ թարմացնում է շոգ ամառային օրերին եւ չի գիրացնում: Կարող եք մատուցել չորացրած հացի հետ՝ զարդարելով նեխուրի տերեւներով:
Բարի ախորժակ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
