Ոստիկանության աշխատանքային հանձնաժողովը, որն ստեղծվել էր մասնավոր պահնորդական գործունեությամբ զբաղվելու թույլտվություն տալու համար, այսօր առաջին անգամ հրավիրել էր աշխատանքային նիստ՝ լրատվամիջոցների մասնակցությամբ:
Հանձնաժողովի նախագահ պարոն Հովհաննիսյանին հանձնաժողովի քարտուղարը տեղեկացրեց, որ առկա են երեք հայտեր՝ «Սիս Սիքյուռ», «Ալֆա-Դելտա» եւ «Արմ Մոբիլ» ընկերություններից, որոնց ներկայացուցիչներին բացատրվեցին իրենց իրավունքները:
Ըստ այդ իրավունքների, նրանք հանձնաժողովին հայտ ներկայացնելու հետ կապված կարող են տալ հարցեր, անել միջնորդություններ:
Հանձնաժողովի քարտուղար պարոն Ալոյանը տեղեկացրեց, որ երկու տարի առաջ Ազգային ժողովն ընդունել էր լիցենզավորման մասին օրենքը, ապա՝ պահնորդական գործունեության մասին օրենքը, կատարվել էին նաեւ լրացումներ:
Կարդացեք նաև
«Մասնավոր պահնորդական գործունեության մասին» ՀՀ օրենքն ուժի մեջ է մտել այս տարվա հուլիսի մեկից:
Լիցենզավորման հետ կապված կան ոստիկանապետի հրամանները, որոնք վերաբերում էին պահնորդների եւ թիկնապահների գործունեության կարգին, որակավորման պահանջներին, հատուկ միջոցների մարտավարության գործարկման կարգին:
Aravot.am-ի հարցին, թե պարտադի՞ր է, արդյոք, ոստիկանության նախկին աշխատակից լինելու հանգամանքը, լիցենզավորման հանձնաժողովի նախագահն ասաց, որ դա պարտադիր չէ:Հաջորդ հարցին, թե մասնավոր ընկերությունը տվյալների բազայում ներառո՞ւմ է հնարավոր պահնորդի նախկինում դատված լինելու հանգամանքը, վստահեցվեց, որ հանձնաժողովի անդամները, որոնք բարձրաստիճան ոստիկանության աշխատակիցներ են, հենց այդ նպատակով են հանձնաժողովում ընդգրկվել, նրանք վերահսկելու են գործընթացը:
Հայտերի հաստատման հարցը որոշվում է դռնփակ կարգով, եւ հարցին, թե կա՞ որոշակի ժամանակ, ասվեց, որ այն տեւում է կես ժամ, հատուկ ժամանակ չի նախատեսված:
Միայն մի հայտատու կազմակերպության՝«Արմ Մոբիլի» աշխատակիցներից մեկի հաշվառման հետ կապված ծագել էր խնդիր.հայտատուն վստահեցրեց, որ երեք օրվա ընթացքում իրենց ապագա աշխատակցի հաշվառման հարցը կլուծվի:
Մեր հարցին, թե կա՞ն կանայք հայտատու կազմակերպություններում, պարզվեց, որ կանայք էլ անտարբեր չեն եւ ընկերությունները դեմ չեն լինի, քանի որ չկա սահմանափակում այդ հարցում էլ:
Ռուզան ՄԻՆԱՍՅԱՆ
