Երեկ կեսօրին ՀԱՕԿ-ի մարզական պատվիրակությունը Երեւան-Մոսկվա-Շանհայ չվերթով մեկնեց Չինաստան՝ մասնակցելու օգոստոսի 16-ից 28-ը Նանջինգում կայանալիք երկրորդ պատանեկան ամառային օլիմպիական խաղերին:
«Առավոտը» հենց «Զվարթնոց» օդանավակայանում զրուցեց Հայաստանի պատվիրակության ղեկավար, ՀԱՕԿ-ի գլխավոր քարտուղար Հրաչյա Ռոստոմյանի հետ, որը նույնպես մեկնում էր մրցավայր:
– Պարոն Ռոստոմյան: Պատանեկան օլիմպիական խաղերին մեր հանրապետությունը, ինչպես Սինգապուրում կայացած առաջին Խաղերում, ներկայացված է լինելու 14 մասնակցով, որոնք պայքարի մեջ են մտնելու ինը մարզաձեւերում` ծանրամարտ, բռնցքամարտ, սպորտային մարմնամարզություն, ձյուդո, հունահռոմեական ըմբշամարտ, հրաձգություն, ազատ ըմբշամարտ, լող, ջրացատկ: Ինչպե՞ս է ընթացել նախապատրաստությունը:
– Ընդհանուր նախապատրաստական աշխատանքները, որ նախանշել են բոլոր մարզաձեւերի ֆեդերացիաները, թե ՀԱՕԿ-ը, թե իրենք՝ ֆեդերացիաները, կատարել են: Որեւէ ուշացում կամ թերացում չի եղել թե ժամանակացույցում, թե ընդհանուր առմամբ: Բոլոր խնդիրները, իսկ դրանք զուտ աշխատանքային են եղել, կարգավորված են: Մնում է մի փոքր էլ հաջողություն եւ ամեն բան լավ է լինելու:
Կարդացեք նաև
– Պատանի մարզիկների հետ հույսեր կա՞ն կապված:
– Գիտեք, որ Նանջինգում ունենք 14 մասնակից ու բոլորն էլ վարկանիշ նվաճած մարզիկներ են: Այսինքն, նրանք պետք է լինեին իրենց տարիքային խմբի աշխարհի, Եվրոպայի առաջնությունների չեմպիոն կամ մեդալակիր: Մենք այս թիմում ունենք աշխարհի գործող երկու չեմպիոն ու մրցանակակիրներ, Եվրոպայի չեմպիոններ ու մեդալակիր մարզիկներ: Այսինքն, պատահական մարդ չկա:
Եթե հիշում եք, Սինգապուրի առաջին պատանեկան օլիմպիական խաղերից հետո Հայաստանի ազգային օլիմպիական կոմիտեն իր առջեւ գերակա խնդիր էր դրել՝ ընդլայնել մարզաձեւերի աշխարհագրությունը եւ բարձրացնել մասնակիցների մարզական որակները: Դա, ինչպես տեսնում եք, մեզ հաջողվել է: Նանջինգում ունենք լողորդ, ջրացատկորդ, սպորտային մարմնամարզիկ ու նրանք սպիտակ քարտով չէ, որ մեկնում են մրցավայր, այլ ձեռք բերված ուղեգրով: Ես գտնում եմ, որ ընդհանուր օլիմպիական հավաքականում բավականին լավ կազմ է հավաքվել:
– Հարցս այլ կերպ եւ ավելի կոնկրետ ձեւակերպեմ. Նանջինգում մեդալներ կլինե՞ն եւ Սինգապուրի արդյունքները կգերազանցվե՞ն:
– Սպորտում կանխատեսումներ անելն անշնորհակալ գործ է: Բայց եթե հավաքականի կազմին ու մարզիկների տիտղոսներին եւ ընդհանուր արդյունքներին նայելու լինենք, մենք երբեք այսքան ուժեղ կազմով որեւէ մրցաշար չենք մեկնել՝ լինի մեծահասակների օլիմպիական խաղեր, թե պատանիների: Կատակ բան չի՝ մեր հավաքականում կան աշխարհի գործող երկու չեմպիոններ, մրցանակակիրներ:Եվրոպայի մասին դեռ չեմ խոսում: Մնում է, որ իրենք՝ մասնակիցները, Խաղերում կազմակերպված հանդես գան, հոգեբանորեն իրենց ընկճված կամ ճնշված չզգան, հավատան ու վստահ լինեն իրենց կարողություններին: Եվ եթե այնպես լինի, ինչպես հիմա ասացի, չեմ կարծում, թե որեւէ մեկը մեր ձեռքին կդիմանա:
Աշոտ ՀԱԿՈԲՅԱՆ
«Առավոտ» օրաթերթ
12.08.2014 թ
