«Ես չեմ գիտակցել, որ տեղի են ունենում մասսայական հափշտակություններ, և իմ՝ այդ խմբի անդամ լինելու մասին: Ես պարտավոր եմ եղել վճարել վճարման ցուցակում նշված գումարները: Եղել են դեպքեր, երբ դեպոնենտ գումարը վճարել եմ կենսաթոշակառուների բարեկամներին, ես շատ դեպքերում չեմ ճանաչել նրանց, իմ ղեկավարությունն է հրահանգել վճարել նրանց, կենսաթոշակառուների կամքով»- Վազգեն Խաչիկյանի եւ 12 ամբաստանյալների նկատմամբ հարուցված քրեական գործի դատաքննության ընթացքում այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում հայտարարեց ամբաստանյալ Վիգեն Գևորգյանը:
Այնուհետև շարունակեց. «Իմ պահանջով ցուցակներում նշել եմ կենսաթոշակ ստացող մարդկանց անձը հաստատող փաստաթղթերի տվյալները: Եթե գիտակցեի, որ հափշտակություններ էին տեղի ունենում, երբեք այդ տվյալները չէի գրի: Ինձ առաջադրված մեղադրանքը չի համապատասխանում իրականությանը: Ավելին, որոշ դեպքերում վճարումների ժամանակահատվածում ես Հայաստանում չեմ էլ եղել: Ինձ հասկանալի էր, որ առանց լիազորագրի որևէ թոշակառուի բարեկամի իրավունք չունեի վճարել, բայց ես դա արել եմ Խաչիկյանի հանձնարարությամբ»:
Մեղադրող կողմի միջնորդությամբ հրապարակվեց Վիգեն Գևորգյանի նախաքննական ցուցմունքը: Նա գրել էր, որ ինչ վճարումներ էլ կատարել է կենսաթոշակառուների բարեկամներին, կատարել է Խաչիկյանի՝ ղեկավարության հանձնարարությամբ. «Արթուր Սուքիասյանը, երբ գալիս ինձնից ինչ-որ թոշակառուների գումարներ էր ստանում, դրանց կեսը թողնում էր ինձ մոտ: Դրանից տեղյակ էր ղեկավարությունը, ես այդ գումարները թողնում էի Հ. Գրիգորյանի մոտ: Միայն ամսվա վերջին Գրիգորյանն ինձ մոտ թողնում էր 10-40.000 դրամ: Դա կատարվել է շուրջ վեց ամիս»:
Նշենք, որ մեղադրող կողմը պնդում է, որ Արթուր Սուքիասյանը ստացել է հանգուցյալ մարդկանց կենսաթոշակներ:
Կարդացեք նաև
Վիգեն Գևորգյանն իր նախաքննական ցուցմունքում շեշտում էր այն միտքը, թե ինքը թոշակառուների բարեկամներին առանց որևէ լիազորագրի թոշակներ է վճարել, քանի որ դա եղել է Խաչիկյանի՝ իր ղեկավարության գիտությամբ. «Իրավունք չունեի սահմանված կարգի խախտմամբ կենսաթոշակի գումար վճարել, բայց դա արել եմ Խաչիկյանի հանձնարարությամբ, քանի որ հնարավոր է՝ չկատարելու դեպքում ինձ ազատեին աշխատանքից»:
Նշենք, որ նախաքննական ցուցմունքի հրապարակումից հետո Վիգեն Գևորգյանը հայտարարեց, թե հրաժարվում է իր տված նախկին ցուցմունքներից և խնդրեց հիմք ընդունել դատաքննական ցուցմունքները:
Տաթև ՀԱՐՈՒԹՅՈՒՆՅԱՆ
