10 տարի Վիեննայում բնակվող Մարգո և Վարդուհի քույրերին կարոտն է բերել Հայաստան: «Ծաղկաձորում շատ բան է փոխվել: Առաջ հետաքրքիր էր. հանգստյան տներն էքսկուրսիաներ, երեկույթներ էին կազմակերպում»: Նրանց կարծիքով` Ծաղկաձորում հանգիստը մատչելի չէ Հայաստանի քաղաքացու գրպանի համար:
Ծաղկաձորի հյուրանոցների ասոցիացիայի տնօրեն էդգար Սողոմոնյանը գտնում է, որ նման թյուր կարծիքը գալիս է անտեղյակությունից: «Քաղաքապետարանի որոշմամք` արդեն ավարտել ենք ինֆորմացիոն կենտրոնի կառուցումը: Մեր նպատակն է այցելուներին տրամադրել բազմակողմանի տեղեկատվություն»:
Քաղաքում ներկայումս իրականացվող նախագծերից նա շեշտեց անտառ տանող ճեմուղու կառուցումը, որտեղ կլինեն սրճարան, մանկական խաղահրապարակ և բացօթյա կինոթատրոն: Ենթադրվում է, որ այն կգործարկվի մեկ տարուց. «Այսօր մարդիկ առանց պատճառի շաբաթ, կիրակի օրերին գալիս են իրենց ընտանիքներով հանգստանալու, քաղաքի աղմուկից կտրվելու: Ուր էլ գնան` Գերմանիա, Ֆրանսիա, վերջում գալիս են Ծաղկաձոր: Մեր քաղաքի համն ու հոտն ուրիշ ա»:
Մշակութային կյանքի վերաբերյալ Օրբելի եղբայրների տուն-թանգարանի ավագ գիտաշխատող Գերասիմ Մկրտչյանը հպարտությամբ նշեց, որ տարեցտարի ավելանում է այցելությունների քանակը: Դրան մեծապես նպաստում են բազմաթիվ ցուցադրությունները, Օրբելի եղբայրների մոր դաշնամուրի ելևէջները, ինչը հաճելի անակնկալ է օտարերկրացիների համար: «Մեր խնդիրն է կենդանի դարձնել թանգարանը: Մասնագետները պետք է վերանայեն թանգարանային արժեքները, ինչը կխթանի տուրիզմի զարգացմանը»:
Կարդացեք նաև
Մեջբերելով Աբգար Օրբելու խոսքերը` «Ես շատ ուրախ եմ, որ իմ որդիները գնում են նյութապես անապահով ճանապարհով հանուն գիտության և այն ազգի, որի զավակներն են…», մեր զրուցակիցը հավելեց, որ նոր սերունդը սկսել է հակվել դեպի գիտությունը, և դա մեծ ձեռքբերում է:
Անի ԱՆՏՈՆՅԱՆ
