Արմեն Աշոտյանն ասում է, որ ԿԳ նախարարությունը չի միջամտում բուհերի ակադեմիական ազատություններին
Երեւանի պետական համալսարանի (ԵՊՀ) քիմիայի ֆակուլտետը՝ դեղագիտության եւ քիմիայի ֆակուլտետի վերափոխելը վերջին օրերին մասնագետների շրջանում քննարկվող ամենատաք թեմաներից է:
Aravot.am-ը ԿԳ նախարար Արմեն Աշոտյանից հետաքրքրվեց, թե ինչ կարծիքի է ԵՊՀ ֆակուլտետի ուղղվածության փոփոխության մասին:
«Բուհերն ունեն լիարժեք ակադեմիական ազատություններ եւ իրենք են տնօրինում իրենց ծրագրերի բովանդակությունն ու կառուցվածքը: Ակնհայտ է, որ քիմիայի ոլորտը տասը տարուց ավել է Հայաստանում անկում է ապրում, դա երեւում է դիմորդների քանակից, երեւում է անգամ դպրոցներում: Գուցե գլոբալ առումով դրա օբյեկտիվ հիմքը աշխատաշուկայում տվյալ մասնագիտությամբ բարձր վարձատրվող տեղերի սակավությունն է: Մինչեւ քիմիական արդյունաբերությունը լավ զարգացած չլինի, քիմիական մասնագիտությունները պահանջարկ չեն ունենալու»,-ասաց նախարարը:
Կարդացեք նաև
Մեր դիտարկմանը, թե Մ. Հերացու անվան բժշկական համալսարանը եւ բժշկական քոլեջները, այսպես թե այնպես պատրաստում են դեղագետներ ու դեղագործներ, եւ մի՞թե Հայաստանում այդ ոլորտի մասնագետների այդքան մեծ պահանջարկ կա, որ համալասրանը նման քայլի գնար, Արմեն Աշոտյանը պատասխանեց. «Բժշկական համալսարանն է դեղագործական կրթության եւ ընդհանրապես առողջապահական մասնագիտությւոնների միակ alma mater-ը, սա խնդրում եմ ֆիքսեք, եւ հետո դեղագործական քիմիայի ծրագիրն էլ զուտ դեղագործություն չէ: Ակնհայտ է, որ նպատակը մարկետինգային է, վստահ եմ, որ Երեւանի պետական համալսարանն այնքան լավ ավանդույթներ ունի, այդ թվում՝ եւ քիմիական կրթության, որ քիմիան չի կորի, չի ստվերվի՝ որպես ուղղություն, ուղղակի ժամանակավոր դժվարություններից ելնելով ֆակուլտետը ուսանողներով ապահովելու, դասախոսներին չկրճատելու լուծում է մտածվել: Ինչ վերաբերում է մեր նախարարությանը, կրկնում եմ՝ այն չի խառնվում բուհական ազատություններին»:
Գոհար ՀԱԿՈԲՅԱՆ
