«ԱԺ 4 խմբակցություններ 12 կետանոց առաջարկ են ներկայացրել երկրի իշխանություններին, որն ուղղված էր երկրի տնտեսության առողջացմանը եւ քաղաքական համակարգի կայացմանը: Դա, իհարկե, չի նշանակում, որ երկրի առջեւ կանգնած խնդիրները սահմանափակվում են այդ 12 խնդիրներով: Կուտակված խնդիրները շատ են, դա պայմանավորված է ապաշնորհ կառավարմամբ»,- այսօր ԱԺ հայտարարությունների ժամին այսպես Քառյակի 12 կետերի մասին հիշեց ՀԱԿ խմբակցության պատգամավոր Ստեփան Դեմիրճյանը:
Նա հարց ուղղեց իշխանություններին. «Ո՞վ է առ այսօր պատասխան տվել 2008-ի մարտի 1-ի 10 սպանությունների համար, եւ ո՞վ է հավատում, որ այդ ոճրագործությունը հնարավոր չէ բացահայտել: Կոռուպցիայի դեմ անհաշտ պայքարի մասին հայտարարող վարչախումբը իշխանական լծակներն օգտագործում է իր մերձավորներին եկամտաբեր պաշտոնների տեղավորելու, նրանց բիզնես շահերը սպասարկելու նպատակով եւ անամոթաբար խոսում արդարությունից եւ օրինականությունից: ՎՊ վերջին զեկույցը եւս մեկ անգամ ցույց տվեց, թե ինչպես է թալանվում պետական բյուջեն: Այս ամենը խարխլում է մեր պետականության հիմքերը, նպաստում է արտագաղթին: Ավելորդ է խոսել երկրի առաջընթացի մասին, քանի դեռ իշխանությունները մեր երկրում չեն ձեւավորվում արդար պայքարում, չեն ձեւավորվում ժողովրդավարական, արդար ընտրությունների միջոցով»:
Ըստ Ստեփան Դեմիրճյանի, ակնհայտ է, որ անիմաստ է խոսել սահմանդրական փոփոխությունների մասին, քանի դեռ չի իրացվում երկրորդ անփոփոխ հոդվածը. «ՀՀ-ին անհրաժեշտ է ժողովրդի կողմից ընտրված իշխանություն՝ արդար ընտրություններ»:
Կարդացեք նաև
Հռիփսիմե ՋԵԲԵՋՅԱՆ