Հայաստանի անդամակցությունը Եվրասիական տնտեսական միությանը, հիմնադիր երեք երկրների՝ Ռուսաստանի, Ղազախստանի եւ Բելառուսի համար ունի ոչ թե տնտեսական, այլ առավելապես քաղաքական նշանակություն: Այս տեսակետն այսօր «Անալիտիկ» կենտրոնում հայտնեց ԲՀԿ պատգամավոր, տնտեսագետ Միքայել Մելքումյանը:
Պրն Մելքումյանի խոսքով՝ նրանք ունեն 70 միլիոնանոց շուկա, եւ Հայաստանի 3 միլիոնանոց շուկան որեւէ տնտեսական հետաքրքրություն չի ներկայացնում այդ երեք երկրների համար. «Հայաստանի անդամակցությունը նրանց համար միայն քաղաքական նշանակություն ունի»:
Ինչ վերաբերում է Հայաստանին, պրն Մելքումյանի խոսքով, Հայաստանը մտնում է ԵՏՄ ՝ նախընտրելով անվտանգության ռեժիմը. «Անցյալ տարվա սեպտեմբերի երեքից առաջ չունեինք այլընտրանք, թե ինչու չունեինք այլընտրանք՝ այլ հարց է: Այսինքն՝ երեքուկես տարի գնում էինք դեպի Եվրոասոցացում եւ հանկարծ մեր ուղղությունը փոխվեց եւ մենք գնացինք ռազմավարական հիմնական ընկերոջ հետ դեպի Մաքսային միություն»:
Պրն Մելքումյանը նկատեց, որ Հայաստանը ԵՏՄ-ի հետ ճիշտ եւ գրագետ համագործակցություն վարելու եւ քաղաքական կամք ցուցաբերելու դեպքում, կարող է գրանցել որոշակի դրական արդյունքներ. «Սակայն այն 900 ապրանքները, որոնք մենք անվանում էինք զգայուն, կառավարությունը պնդում է, որ այդ զգայուն ապրանքների խնդիրը լուծված է, սակայն ես նման տեղեկատվություն չունեմ, որ դա լուծված է»:
Կարդացեք նաև
Էլյա ՀՈՎՀԱՆՆԻՍՅԱՆ
