«Կառավարությունը փորձում է նոր օրենքների մշակմամբ տնտեսական իրավիճակը բարելավել, բայց դրա արդյունքները մենք դեռ չենք տեսնում: Այս պահի դրությամբ կարող ենք արձանագրել, որ Հայաստանում ակնհայտ տնտեսական աճ չկա, ավելին, այս ընթացքում նկատվում է ներդրումների նվազում»,-այսօր «Անալիտիկ» կենտրոնում, անդրադառնալով Հայաստանի ներկայիս տնտեսական իրավիճակին, այս տեսակետը հայտնեց ԲՀԿ խմբակցության պատգամավոր, տնտեսագետ Միքայել Մելքումյանը:
Տնտեսագետը ասուլիսի ընթացքում խոսեց արեւմուտքի կողմից Ռուսաստանի նկատմամբ պատժամիջոցներից եւ դրանց հնարավոր հետեւանքներից Հայաստանի տնտեսության վրա: Միքայել Մելքումյանը նշեց, որ դրանք որոշակի իրավական ազդեցություն չեն ունենա Հայաստանի տնտեսության վրա: Սակայն, եթե այդ պատժամիջոցները Ռուսաստանում բերելու են տնտեսական ակտիվության թուլացման, իսկ Ռուսաստանում հայերի մեծ մասն էլ աշխատում է հենց Ռուսաստանում շինարարության, ծառայությունների ոլորտում, ապա դրանք նպաստելու են տրանսֆերտների ծավալի նվազմանը: Ռուսական խոշորագույն բանկերի եւ դրանց կապակցված խոշորագույն ընկերությունների ներկայությունը նույնպես նվազելու է. «Հայաստանում մի քանի հազար ռուսական ընկերություններ կան՝ հատկապես էներգետիկ եւ բանկային համակարգում, այստեղ նույնպես որոշակի պրոբլեմներ կառաջանան»:
Տնտեսագետի պնդմամբ՝ պատժամիջոցների հետեւանքով միակ դրական ազդեցությունը լինելու է գյուղատնտեսության ոլորտի վրա. «Գյուղատնտեսական վերամշակվող ապրանքների ծավալներն են, որ հնարավոր է կրկնապատկվեն դեպի ռուսական շուկա: Հայաստանում բանկերի կողմից բարձր տոկոսադրույքներով տրվող ֆինանսական ռեսուրսների միջոցով գյուղական ապրանք թողարկել եւ իրացնել, բնականաբար, ներկայիս դրությամբ շահութաբերություն չի կարող ապահովել»:
Պրն Մելքումյանի խոսքով՝ Հայաստանում խոշոր ներդրումներ չեն արվում. «Այն բացասական սպասումների ֆոնը, որ արդեն հետճգնաժամային փուլում Հայաստանում կա, պետք է հաղթահարել: Արդյոք Հայաստանում ներդրում անելիս կկորցնե՞ս, թե կշահես: Սա է հիմնական խնդիրը, որ այսօր մեր բիզնեսի համար լուրջ սպառնալիք է»:
Կարդացեք նաև
Պրն Մելքումյանի պնդմամբ՝ այսօրվա կառավարությունը դեռեւս չի գտել այն միջոցը, որով կարող են իրական ներդրումներ հոսել դեպի Հայաստան, քանի որ խոշոր ներդրումները վախենում են անկայուն միջավայրից:
Տնտեսագետը օրինակ բերեց, որ դրա պատճառով է, որ մինչ այսօր ռուսական «Ռոսնեֆտ» ընկերությունը հետաքրքրություն չի ներկայացրել «Նաիրիտի» նկատմամբ. «Նաիրիտի» նման հսկայի վերագործարկման համար նվազագույնը 500 մլն դրամից ավելի ներդրում է անհրաժեշտ, իսկ մեր երկրում, որը բացասական սպասումների ֆոնով է պարուրված, 500 մլն դրամ ներդնելու համար լուրջ երաշխիքներ է պահանջում»: Պրն Մելքումյանի խոսքով՝ ոչ թե չեն ուզում «Նաիրիտի» նման գործարանի մեջ ներդրում կատարել, այլ ուղղակի վախենում են նման ներդրում կատարել Հայաստանում:
Էլյա ՀՈՎՀԱՆՆԻՍՅԱՆ
