Տեղեկատվական անվտանգության փորձագետ Սամվել Մարտիրոսյանի տվյալներով՝ վերջին 2 ամիսներին ադրբեջանցիները 100-150 հայկական կայքի վրա են հարձակվել:
«Բայց դրանք լուրջ հարձակումներ չեն եղել»,-վստահեցնում է փորձագետը: Նրա գնահատմամբ, միայն Կենտրոնական բանկի ենթակայքի եւ «Արարատ» բանկի կայքերի վրա հարձակումն էր լուրջ, ինչի մասին բանկը հաճախորդներին չի տեղեկացրել. «1-ին էջի վրա դրվել էր նկար, բայց դա չի նշանակում, որ ադրբեջանցիները կարողացել են ներս թափանցել եւ ինչ-որ տվյալներ ստանալ, չնայած դա չի կարելի նաեւ բացառել: Կան բանկային կայքեր, որոնք անհատական գաղտնի տվյալներ են պարունակում: Վերջին 2 ամսվա ընթացքում հարձակման են ենթարկվել այդպիսի մի քանի կայք։ Նման դեպքում, կայքի ադմինիստրացիան պետք է տեղեկացներ հարձակման մասին, իրազեկեր քաղաքացիներին տվյալների արտահոսքի մասին եւ խորհուրդ տար՝ ինչ անել։ Բայց Հայաստանում այդ մշակույթը դեռ չի ձեւավորվել»:
Պարոն Մարտիրոսյանը արձանագրել է նաեւ, որ վերջին ամիսներին ադրբեջանցիների կողմից իրականացվող կիբերհարձակումների որակն էապես ընկել է, ինչը պայմանավորված է տասնյակ լավագույն մասնագետների աշխատանքից ազատվելու հանգամանքով. «Իրենց նախորդ ղեկավարին հանեցին աշխատանքից, կադրերի մի մասն էլ գործից դուրս մնացին»:
Արփինե ՍԻՄՈՆՅԱՆ
Կարդացեք նաև
