Հայ լուսանկարիչների ցուցահանդես Պրահայում

Նոյեմբերի 12-ին Չեխիայի արտաքին գործերի նախարարության առանձնացված ստորաբաժանում հանդիսացող «Պրահայի չեխական կենտրոններ» գործակալության սրահում Հայաստանի և Չեխիայի մշակույթի նախարարների և Չեխիայում ՀՀ դեսպանության հովանու ներքո բացվեց Չեխիայի 19 հայ նկարիչների և քանդակագործների գործերի ցուցահանդեսը։

Հանդիսավոր արարողությունը բացեց «Պրահայի չեխական կենտրոններ» գործակալության գլխավոր տնօրեն Վիլմա Անիժովան։ Այնուհետև ելույթներ ունեցան ՀՀ մշակույթի նախարար Հասմիկ Պողոսյանը, Չեխիայի մշակույթի նախարարի առաջին տեղակալ Կատերժինա Կալիստովան և Չեխիայում ՀՀ դեսպան Տիգրան Սեյրանյանը։

Նախարար Պողոսյանը նշեց հայ մշակույթը Չեխիայում ներկայացնելու կարևորությունը և ցուցահանդեսը համարեց մի փոքրիկ Հայաստան հիասքանչ Պրահայի կենտրոնում` ավելացնելով, որ հայ նկարիչներն իրենց հետ հայրենիքից բերել են Հայաստանի գույներն ու հոգին: Նախարարն առաջարկեց, որպեսզի Չեխիայի հայ նկարիչների աշխատանքների ցուցահանդես կազմակերպվի նաև Երևանում՝ 2015թ.:

Տիկին Կալիստովան ընդգծեց, որ ցուցահանդեսը բացառիկ է բազմաթիվ տեսանկյուններից, քանզի այն հանդիսանում է չեխ-հայկական մշակութային համագործակցության առավել խոշոր նախագիծը: Այն միտված է նկարիչների ճանաչմանը ու նրանց համար երկրորդ հայրենիք դարձած Չեխիայի հանդեպ ունեցած հայացքների արտահայտմանը:

Դեսպան Սեյրանյանը հանդիսության բազմաթիվ մասնակիցներին ներկայացրեց ցուցահանդեսի կատալոգը, որը տպագրվել է հայաստանյան «Աստղիկ գրատուն» հրատարակչության կողմից (պատրաստվել է Չեխիայում ՀՀ դեսպանության և նկարիչ Հրայր Ղարիբյանի կողմից՝ ՀՀ մշակույթի նախարարության և չեխահայ գործարարներ Գևորգ Ավետիսյանի ու Արամայիս Մեժլումյանի հովանավորությամբ):

Ցուցասրահում և կատալոգում տեղ են գտել բազմաթիվ չեխահայ նկարիչների աշխատանքները:

Ցուցահանդեսի բացման արարողությանը ներկա էին ցուցահանդեսին ներկայացված աշխատանքների հեղինակները, Չեխիայի, Հունգարիայի և Սլովակիայի հոգևոր հովիվ Բարսեղ վարդապետ Փիլավչյանը, Հայաստանում Չեխիայի գործերի հավատարմատար Պետր Միկիսկան, չեխ պատգամավորներ, դիվանագետներ, արվեստի և մշակույթի գործիչներ, հայ համայնքի բազմաթիվ ներկայացուցիչներ։

Ցուցահանդեսը կգործի մինչև նոյեմբերի 22-ը:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ
ՄԱՄՈՒԼԻ, ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԻ ՎԱՐՉՈՒԹՅՈՒՆ