Վանաձորի պետական համալսարանի դասախոսների բաց նամակը նախագահին

Բաց նամակ

ՀՀ նախագահ Սերժ Սարգսյանին

ՀՀ Ազգային Ժողովի նախագահ Գալուստ Սահակյանին

ՀՀ վարչապետ Հովիկ Աբրահամյանին

Մեծարգո պարոն Նախագահ,

Հարգարժան պարոն խոսնակ,

Հարգարժան պարոն վարչապետ,

ՎՊՀ-ի «Արվեստի ամբիոն»-ը հիմնադրվել է 1997թ.-ին՝ «Կերպարվեստ» եւ «Երաժշտական կրթություն»  մասնագիտություններով: Այստեղ դասավանդում են համապատասխան մասնագիտական կրթություն ունեցող  եւ իրենց գործունեությամբ մարզում  հարգանքի արժանացած  մասնագետներ: Շրջանավարտները հիմնականում իրենց մասնագիտությամբ աշխատում են երգչախմբում, նվագախմբում,  երաժշտական, արվեստի, հանրակրթական դպրոցներում, արվեստի խմբակներում եւ այլն:

Ուսանողները աչքի են ընկնում ակտիվությամբ. մասնակցում են մարզում անցկացվող  միջոցառումներին, համերգներին, փառատոններին, ցուցահանդեսներին: Մասնակցություն են ցուցաբերել նաեւ  Գյումրու «Վերածնունդ»  միջազգային փառատոնին, Ա. Բաբաջանյանի ուսանողական միջազգային փառատոնին:

Այժմ ամբիոնի գործունեությունը վտանգված է, քանի որ արդեն երկու տարի «Երաժշտական կրթություն» մասնագիտությամբ ընդունելություն չի հայտարարվել: 2015-16 ուստարում եւս ընդունելություն չի հայտարարվելու, որն էլ վտանգում է մարզում երաժշտարվեստի եւ երգարվեստի զարգացման հեռանկարը:

ՎՊՀ-ի ղեկավարությունը գտնում է, որ երաժշտական կրթությունը ներկա սուղ պայմաններում թանկ արժե, բուհը համապատասխան ֆինանսական միջոցներ չունի բաժինը բացելու համար: Մենք էլ ենք գիտակցում, որ միայն ուսանողների վարձավճարները չեն կարող փակել  դասախոսի աշխատավարձի եւ այլ ծախսերը:

Ըստ պետական կրթական ծրագրերի՝ հանրակրթական դպրոցների 1-7-րդ դասարաններում «Երաժշտություն» եւ «Կերպարվեստ» առարկաները պետք է պարտադիր դասավանդվեն: Այդ դեպքում, որտե՞ղ են կրթություն ստանալու համապատասխան մասնագետները: Ստացվում է, որ ամբողջ մարզում երաժշտական ունակություններով  օժտված եւ այդ ուղղությամբ  կրթությունը շարունակողները  զրկվելու են նախընտրելի մասնագիտությամբ բարձրագույն կրթություն ստանալու հնարավորությունից:

ՎՊՀ-ի Արվեստի ամբիոնի երաժշտության բաժնի դասախոսներ