Օրերս Հաշմանդամություն ունեցող անձանց օրվա առիթով «Ունիսոն» հ/կ-ի նախաձեռնությամբ ֆլեշմոբ իրականացվեց երեւանյան առեւտրի կենտրոններից մեկում: Նկարահանվել էր օրվա թեմայով իրազեկող տեսահոլովակ՝ «Փարոս» կամերային երգչախմբի եւ «Արևներ» մանկապատանեկան անսամբլի մասնակցությամբ:
Ինչպես Aravot.am-ի հետ զրույցում նշեց «Ունիսոն» հ/կ-ի հանրային կապերի ղեկավար Մարիաննա Չալիկյանը. «Կար հիանալի երգչախումբ եւ ներառման թեմա, մտածեցինք ինչո՞ւ երկուսը չհամատեղել մեկ ընդհանուր գաղափարի մեջ: Ի դեպ, «Արեւների» հետ բավականին վաղուց ենք համագործակցում: Մի խոսքով, որոշեցինք վառ, լուսավոր, դրական տեսահոլովակ ստեղծել, որովհետեւ հիմնականում այդ օրը բոլորն ասում են, վա՜յ դժբախտ օր է, չգիտեն շնորհավորե՞ն մարդկանց Հաշմանդամների միջազգային օրվա կապակցությամբ, ողբում են, իրականում դա իրազեկման օր է: Ու իրազեկումն էլ պետք է այնպես իրականացնել, որ մարդկանց մոտ ոգեւորություն, դրական լիցքեր առաջանան»:
Տիկին Չալիկյանը նշեց, որ ֆլեշմոբի կազմակերպման վրա լավ աշխատել էին, բայց հանդիսատեսը, հեռախոսով նկարող ու զարմացած մարդիկ բեմադրված չէին: «Գաղափարը հաջողվեց իրականություն դարձնել, նաեւ Ազնավուրի հանրահայտ «Քեզ համար Հայաստան» երգը շատ խորհրդանշական էր, որովհետեւ իսկապես Հայաստանի համար է դա արվում»:
Գոհար ՀԱԿՈԲՅԱՆ
Կարդացեք նաև
