Վարդան Ղալումյանը դիմել է Մարտին Սարգսյանին
2014թ. սեպտեմբերին Իջեւանի նախկին քաղաքապետ Վարուժան Ներսիսյանը նշանակվել է ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմի Տավուշի մարզային ստորաբաժանման ղեկավար: Վ. Ներսիսյանը 2011-ի նոյեմբերից, համայնքի ղեկավարի ընտրություններում Վարդան Ղալումյանին պարտվելուց հետո, աշխատանք չուներ: Ներսիսյանի` կադաստրի Տավուշի մարզային ստորաբաժանման ղեկավար նշանակվելուց հետո սպասելի էր, որ նրա եւ Իջեւանի քաղաքապետարանի միջեւ հարաբերությունները հարթ չեն լինելու:
Իջեւանի քաղաքապետ Վարդան Ղալումյանը գրավոր դիմել է ՀՀ կառավարությանն առընթեր անշարժ գույքի կադաստրի պետական կոմիտեի նախագահ Մարտին Սարգսյանին, որտեղ քաղաքապետը հույս է հայտնել, որ Մ. Սարգսյանի հանձնարարականով պարզաբանում կտրվի եւ կլուծվի 2014թ. նոյեմբերի 28-ին կադաստրի պետական կոմիտեի Տավուշի մարզային ստորաբաժանում ուղարկված իր դիմումի մեջ բարձրացված խնդիրը: Քաղաքապետը հայտնել է, որ կադաստրի մարզային ստորաբաժանումը, կասեցնելով կոնկրետ անձնավորության անշարժ գույքի պետական գրանցումը, որպես կասեցման հիմնավորում, նշել է կառավարության 2005թ. որոշումը եւ քաղաքաշինության նախարարի համաձայնության բացակայությունը: Ղալումյանը դիմումի մեջ դրան հակադարձել է. « ՀՀ կառավարության 29.12.2005թ. թիվ 2404-Ն որոշման 1-ին և 8-րդ կետերի ուժով անհրաժեշտ է ներկայացնել ՀՀ քաղաքաշինության նախարարի համաձայնությունը, երբ հիշյալ որոշման 8-րդ կետի սահմանման մեջ, որպես ՀՀ քաղաքաշինության նախարարի համաձայնության պայման է առաջացնում միայն քաղաքաշինական նպատակներով հողօգտագործման վերաբերյալ առաջարկությունները, ճարտարապետահատակագծային առաջադրանքի (կից ներկայացվող կառուցապատման սխեմայով) տրամադրման գործառույթների դեպքերում միայն, իսկ սույն դեպքը հիշյալ պայմաններից և որևէ մեկին չի համընկնում, ընդամենը առկա է օրենքով սահմանված կարգով ձեռք բերված տարածքի նկատմամբ պետական գրանցման իրավական ռեժիմ»:
Վ. Ղալումյանը նշել է. «Ստորաբաժանման ներկայիս ղեկավարը հանդիսացել է իմ իրավանախորդը, և մեր միջև քաղաքական հայացքների շուրջ ձևավորվել են որոշակի տարաձայնություններ, իսկ ստորաբաժանման ղեկավարը մինչև օրս բոլոր հնարավորությունները՝ այդ թվում ներկայիս լիազորությունները օգտագործում է իր ունեցած սկզբունքներին համահունչ»: Քաղաքապետը դիմումի մեջ Վ. Ներսիսյանի նման գործելակերպն անթույլատրելի համարելով՝ հայտնել է, որ այն Իջեւանի քաղաքապետարանի եւ քաղաքի բնակիչների համար խոչընդոտներ, նաեւ բացասական հետեւանքներ է առաջացնում: Վարդան Ղալումյանն ասաց, որ որ կադաստրի պետական կոմիտեի Տավուշի մարզային ստորաբաժանումը նախկինում վերոհիշյալ պատճառաբանությամբ չի կասեցրել որեւէ քաղաքացու անշարժ գույքի հանդեպ սեփականության իրավունքի գրանցումը:
Կարդացեք նաև
Ոսկան ՍԱՐԳՍՅԱՆ
Ամեն ինչ հասկանալի է, սակայն պարզ չէ, թէ այդ ՛՛կոնկրետ անձնավորությունն՛՛ ինչու չի դատարան դիմում և իր իրավունքներն օրենքով սահմանված կարգով պահպանում? Ի վերջո Վ.Ղալումյանը գործող քաղաքապետ է, այլ ոչ թե ՛՛կոնկրետ անձանվորության՛՛ փաստաբան: