Այսօր Արարատյան Հայրապետական թեմի առաջնորդանիստ Սուրբ Սարգիս եկեղեցում գրոսմայստեր Վլադիմիր Հակոբյանը միաժամանակյա խաղի սեանս անցկացրեց քահանաների եւ թեմի եկեղեցասեր երիտասարդաց միությունների ներկայացուցիչների հետ:
Մինչեւ սեանսի սկսվելը մասնակիցներն արտասանեցին «Հայր Մերը» եւ առաջին փուլում միմյանց միջեւ որոշեցին ուժեղներին, որոնք էլ երկրորդ փուլում անվանի գրոսմայստերի հետ խաղատախտակների առջեւ իրենց կարողությունները փորձելու հնարավորություն ստացան:
Առաջնորդարանի ս-բ. Սարգիս եկեղեցու հոգեւոր հովիվ, Արարատյան Հայրապետական թեմի եկեղեցասեր երիտասարդաց միությունների համակարգող Տեր Պետրոս Ավագ քահանա Մալյանն Aravot.am-ի հետ զրույցում ասաց. «Այս միջոցառումը նախապատմություն ունի: Անցած տարի Քրիստոսի նախավկա սուրբ Աբգար թագավորի տոնի առիթով Արարատյան Հայրապետական թեմի երիտասարդները որոշեցին շախմատային մրցաշար կազմակերպել, որպեսզի այն դառնա ամենամյա: Եվ ստանալով Արարատյան Հայրապետական թեմի առաջնորդական փոխանորդ գերաշնորհ Տեր Նավասարդ սրբազանի օրհնությունը, մրցաշարը հաստատվեց որպես ամենամյա միջոցառում եւ արդեն երկրորդ տարին այն անցկացվում է ս-բ. Աբգար թագավորի տոնի առիթով: Անցած տարի միաժամանակյա խաղի սեանս անցկացրեց մեր անվանի շախմատիստներից գրոսմայստեր Գաբրիել Սարգսյանը: Այս տարի, ինչպես տեսնում եք, ձեւաչափը մի փոքր փոխել ենք եւ մրցաշարն անցնում է երկու փուլով: Այնպես որ, շախմատային այս մրցաշարը մեր երիտասարդաց միությունների հաջողված ծրագրերից մեկն է»:
Մեր հարցին, թե ի՞նչ կապ է տեսնում շախմատի եւ հոգեւորականի միջեւ եւ մրցաշարի մասնակից քահանաների մեջ կարգային շախմատիստներ կա՞ն, Տեր Պետրոս Ավագ քահանա Մալյանը պատասխանեց. «Շախմատը ինտելեկտուալ խաղ է եւ ցանկացած մարդ, հատկապես, հայ հավատացյալը եւ հոգեւորականը, պիտի ինտելեկտով զարգացած լինի: Արդեն չկա խորհրդային այն կարծրատիպը, թե քրիստոնեությունը խեղճ ու կրակների հավատք է: Մեր բոլոր երիտասարդները զարգացած են, հայրենասեր: Նրանք ոչ միայն շախմատ գիտեն, այլեւ բազմակողմանիորեն զարգացած են՝ երգ, մշակույթ, արվեստ եւ այլ բնագավառներ: Իսկ թե մեր քահանաների մեջ կարգային շախմատիստներ կան, թե ո՞չ, անկեղծ ասած տեղյակ չեմ: Բայց գիտեմ, որ շախմատ լավ խաղացողներ կան եւ նրանց միջից ընտրել ենք ամենաուժեղներին»:
Կարդացեք նաև
Աշոտ ՀԱԿՈԲՅԱՆ
