Քիչ առաջ Գյումրու Սուրբ Նշան եկեղեցում տեղի ունեցավ սպանված Ավետիսյանների ընտանիքի հոգեհանգիստի արարողությունը: Եվ մինչև գյումրեցիների կեսը 102-րդ ռազմաբազայի դիմաց պահանջում էին մարդասպանին հանձնել հայերի դատին՝ Շիրակի թեմի առաջնորդ Միքայել եպիսկոպոս Աջապահյանն էլ Սուրբ Նշան եկեղեցում իր հերթին հանդես եկավ որպես պահանջատեր: Վերջինս, դիմելով սգակիր գյումրեցիներին և հայ ժողովրդին՝ ասաց, որ ոճրագործը Աստծո մոտ կորցրել է մարդ կոչվելու իրավունքը:
«Մենք Նոր Տարվա օրերի մեջ էինք, Սուրբ ծննդյան օրերի մեջ էինք և ապրեցինք Սուրբ ծննդյան հաջորդաց բեթղեհեմյան մանուկների կոտորածը վերստին»,- ասաց Սրբազանը: Ըստ նրա, Ավետիսյանները իրենց նահատակությամբ փրկեցին մնացած գյումրեցիներին, քանի որ, նրա բառերով ասած, մարդանման կենդանին կարող էր ներխուժել ու սպանել ցանկացած մեկին:
«Մենք ուրիշ բան չենք ուզում, եթե ոչ ապահովություն ու խաղաղություն, և մենք զինվորին միշտ նայել ենք իբրև խաղաղության երաշխիք, ապահովության գրավական, ոչ թե մեր տունը գիշերը մտնող և մեր զավականերին սպանող, մորթող: Ուրեմն ինչ-որ բան, ինչ-որ տեղ սխալ է, և այդ սխալը սրբագրել ենք պահանջում: Զինվորը չի կարող ոճրագործ լինել, ասքյարն է ոճրագործ: Եվ այստեղ պիտի բացվի շղթան, ովքեր են մեղավոր, որ այդպիսի մի երևույթ հայտնվեց մեր քաղաքում և շրջեց մեր քաղաքում անարգել, զենքը իր վրա. հարցեր, որոնք մեր ժողովուրդը իրավունք ունի տալու և սպառիչ պատասխան ստանալու:
Մենք ուզում ենք, որ մեր երեխաները քնեն ապահով, հանգիստ ու խաղաղ, մեծ բա՞ն է մեր ուզածը: Մեր քաղաքը սիրալիրության, հյուրասիրության, հյուընկալության քաղաք է, այստեղ միշտ ապրել են տարբեր ազգեր, տարբեր դավանանքի մարդիկ, ապրել են խաղաղ, ապրել երջանիկ, ո՞ր մութ ուժն է, որ փորձում է ջլատել, որպեսզի մեկս մյուսիս սկսենք նայել կասկածամտությամբ, ազգայնական հարցեր ծագեն, ներազգային խնդիրներ ծագեն, գտնել է պետք այդ մութ ուժին, դա ենք մենք պահանջում: 2015 թվականին մենք հերթական եղեռնի պատրաստ չէինք, և այն էլ եղբայրական համարվող ազգի ներկայացուցչի կողմից:
Կարդացեք նաև
Սա պարզ քաղաքացի չէր՝ հանցագործություն կատարողը, զինվոր է, և սա նշանակում է, որ պետությունը պատասխանատվություն և պարտականություն ունի պատասխան տալու դրա համար: Եվ այդ պատասխանը Գյումրիի ժողովուրդը իրավունք ունի պահանջելու Ռուսաստանի Դաշնությունից, որքան էլ այդ երկիրը մեծ ու հզոր երևա:
Գյումրեցին չի վախեցել թուրքից, չի վախեցել պարսիկից և չի վախենում որևիցե մեկից», -ասաց հոգևոր առաջնորդը: Ըստ Միքայել Սրբազանի, եթե կա այս քաղաքում մի հաստատություն, որ վնաս է մեր ժողովրդի անվտանգությանը, այդ հարցը պիտի քննարկվի:
Միքայել Սրբազանի ելույթը` տեսանյութում:
Նունե ԱՐԵՎՇԱՏՅԱՆ
