Այսօր Երևանի Կենտրոն և Նորք Մարաշ վարչական շրջանների ընդհանուր իրավասության դատարանում, դատավոր Արայիկ Մելքումյանի նախագահությամբ, (Թբիլիսյան խճուղի) տեղի ունեցավ ՀՀ քաղաքացիներ Արման Սահակյանի, Գրիգոր Գևորգյանի և Հովհաննես Մկրտչյանի ընդդեմ «Իրավունք» թերթի և նույն թերթի խմբագիր Հովհաննես Գալաջյանի նախնական դատական նիստը:
Նիստի ընթացքում հայցվորների ներկայացուցիչ Մարո Խաչատուրյանը ներկայացրեց նախապես ներկայացված հայցի հիմքի և առարկայի փոփոխումը, որի կրկնօրինակները հանձնվեցին Դատարանին և պատասխանող կողմին:
Դատական նիստի ընթացքում հայցվոր կողմի փաստաբան Մարո Խաչատուրյանը ներկայացրեց միջնորդություն հայցի ապահովման մասին հետևյալ պահանջներով՝
1.հիմք ընդունելով պատասխանող «Իրավունքի Մեդիա» ՍՊԸ-ի գործունեությունը կապված յուրաքանչյուր դատական նիստից հետո նոր հոդվածների հրատարակությամբ, որոնցում նույնպես առկա են վիրավորական արտահայտություններ, անհրաժեշտություն է ծագում կիրառելու հայցի ապահովման միջոց` արգելելով պատասխանողի կողմից նոր հրատարակումները մինչև գործով կայացված դատական ակտի ուժի մեջ մտնելը,
Կարդացեք նաև
2.արգելանք դնել պատասխանող Հովհաննես Գալաջյանի դրամական միջոցների և այլ գույքի նկատմամբ հայցագնի չափով:
Պատասխանող կողմը ժամանակ խնդրեց ծանոթանալու նոր հայցի հիմքերին և առարկային, որից հետո հաջորդ դատական նիստը նշանակվեց ս/թ. փետրվարի 10-ին ժամը 12:15-ին:
«Նոր Սերունդ» մարդասիրական հասարակական կազմակերպության 3 աշխատակիցները՝ Գրիգոր Գևորգյանը, Արման Սահակյանը և Հովհաննես Մկրտչյանը, դատական հայցով դիմել են դատարան ընդդեմ «Իրավունք» թերթի, որը հրապարակել և հրատարակել էր «Նրանք սպասարկում են միջազգային համասեռամոլ լոբբինգի շահերը. Ազգի և պետության թշնամիների սև ցուցակը» հոդվածը: Կազմակերպության աշխատակիցները պահանջում են հրապարակայնորեն ներողություն խնդրել իրենց պատիվն ու արժանապատվությունը վիրավորելու համար և յուրաքանչյուրին փոխհատուցել 3 մլն դրամ:
Հիշեցնենք նաև, որ նույն հոդվածի առնչությամբ Երևանի Կենտրոն և Նորք Մարաշ համայնքների առաջին ատյանի դատարանի դատավոր Ռուբեն Ներսիսյանը հոկտեմբերի 30-ին կայացած դատական նիստում վճռել է մերժել 16 քաղաքացիների հայցն ընդդեմ «Իրավունք» թերթի:
Հավելենք, որ «Նոր Սերունդ» Մարդասիրական Հասարակական Կազմակերպությունը ևս դատական հայց է ներկայացրել ընդդեմ «Իրավունք» թերթի՝ կազմակերպության գործունեությունը արատավորելու համար:
Գրիգոր ԳԵՎՈՐԳՅԱՆ »
Նոր Սերունդ» Մարդասիրական ՀԿ Տեղեկատվության և գրանցման համակարգող
Արխիվային լուսանկարում՝ բողոքի ցույց «Իրավունքի» դեմ այս հոդվածի առնչությամբ առաջին դատավարության ընթացքում
