ԲՀԿ-ական պատգամավոր Մարտուն Գրիգորյանը՝ Վլադիմիր Գասպարյանի
հայտարարության, քաղաքական PR-ի եւ Գյումրիում զարգացումների մասին
– Օրերս ՀՀ ոստիկանապետ Վլադիմիր Գասպարյանը հայտարարել էր. «Շատ ճիշտ են անում, որ Գյումրիի ցուցարարները հրավիրվում են ոստիկանություն: Չի լինում այդպես, որ կարող է ինչ-որ մարդկանց տրամադրեն նման երեւույթների եւ անպատիժ մնան կազմակերպիչները: Ովքեր կազմակերպել են այդ ջարդը` մտքներով անցել է, որ կարելի է ոստիկաններին քարերով ծեծել եւ խառնել իրավիճակը, այդ մարդիկ պատասխանատվություն պետք է կրեն եւ պատժվեն»: Խոսքը քրեական պատիժների մասին է: Ի դեպ, բողոքի ակցիայի մասնակիցներին արդեն իսկ ծանուցագրեր են ուղարկվում: Ըստ Ձեզ՝ կայի՞ն կազմակերպիչներ, ովքե՞ր էին նրանք: Ընդհանրապես ինչպե՞ս եք վերաբերվում ոստիկանապետի հայտարարությանը:
– Ես տեղեկատվություն չունեմ, որ մարդկանց ծանուցագրեր են ուղարկվում: Տեղեկացված եմ այնքանով, որքանով որ լրատվամիջոցներով տարածվում է: Ինչ մնում է կազմակերպիչներին, ես չգիտեմ՝ կոնկրետ կազմակերպիչներ կա՞ն, թե՞ ոչ, կոնկրետ ովքե՞ր են: Եթե ոստիկանությունն արդեն զբաղվում է այդ հարցերով, դրանց պատասխաններն ավելի ճիշտ կտան իրենք: Եթե կան կազմակերպիչներ, կան բախումները հստակ հրահրողներ՝ ոստիկանությունը պետք է գտնի, բացահայտի: Փաստը մնում է փաստ, որ այդ օրը լարվածությունը շատ մեծ էր:
– Aravot.am-ի հետ զրույցում անդրադառնալով ոստիկանապետի հայտարարությանը՝ «Ասպարեզ» ժուռնալիստների ակումբի նախագահ Լեւոն Բարսեղյանը կարծիք հայտնեց, որ իրավիճակն իրականում լարեց ՀՀ գլխավոր դատախազ Գեւորգ Կոստանյանը՝ իր հայտարարություններով:
Կարդացեք նաև
– Նույն հարցի պատասխանը նույն կերպ ես կտամ՝ ուղղակի առանց հստակ անուններ տալու: Ես առաջին օրից ասել եմ՝ յուրաքանչյուր ոչ ճիշտ տեղեկատվություն, նմանատիպ հարցազրույցներ կարող են լուրջ լարվածության առիթ հանդիսանալ: Նաեւ նախաքննական ցուցմունքները հրապարակելն էր սխալ՝ իմ կարծիքով, քանի որ այսօր գյումրեցիների մոտ դեռ լարվածություն կա: Յուրաքանչյուր տեղեկություն բաց թողնելուց առաջ պետք է լավ մտածել, որովհետեւ մենք չգիտենք, թե այն ինչի կարող է հանգեցնել, ծառայել: Այսինքն՝ եթե կան մարդիկ, ովքեր սպասում են նմանատիպ առիթների, հենց այդ տեղեկությունները կարող են շատ լավ օգտագործել՝ բողոքի ալիք բարձրացնելու համար:
– Գլխավոր դատախազն, այնուհանդերձ, իր հայտարարություններով, «տղամարդու խոսքով», դրան հետեւած զարգացումներով եւ այլն բորբոքե՞ց իրավիճակը:
– Ես հստակ պատասխանեցի: Հայտարարություն անելուց առաջ պետք է զգույշ լինի յուրաքանչյուր պաշտոնյա, այդ թվում նաեւ՝ դատախազության եւ քննչական կոմիտեի:
– Շատերն ասում են, որ այդ ողբերգական միջադեպին փորձ է արվում քաղաքական աստառ տալ: Դուք տեսնո՞ւմ եք դա, ո՞րն է այն:
– Չեմ կարող հստակ ասել՝ քաղաքական աստառ տալ: Նաեւ՝ մի քիչ անհասկանալի է, թե ի՞նչը նկատի ունեն:
– ՀՀ-ՌԴ հարաբերություններում լարվածություն մտցնելը:
– Եթե նման աստառ տալու քայլեր արվեն՝ ճիշտ չի լինի, բացասական անդրադարձ կունենա: Չմոռանանք, որ Գյումրիում մի քանի հազար ռուսներ են բնակվում: Գյումրին էլ գոյատեւում է ռուսների, այսպես ասած, գումարներով՝ նրանց ստացած աշխատավարձերով, Գյումրիում ծախսվող գումարներով: Ուստի յուրաքանչյուր քայլ անելուց առաջ պետք է լավ մտածենք:
Թե լրատվամիջոցները, թե մյուսները, ամենքն իրենց քաղաքական կամ PR-ի հետ կապված անելիքներն անում են, գնում են, հետո մենք մնում ենք Գյումրիում՝ մեր հոգսերի եւ այս պահի դրությամբ՝ ռուսների հետ ապրելու: Ավելորդ լարվածությունը մեզ ոչ մի դրական բանի չի բերում: Իմ քաղաքի խնդիրներից ելնելով՝ ես չէի ցանկանա, որ այս հարցին քաղաքական աստառ տրվեր, հայ-ռուսական հարաբերությունները փչանային, քանի որ դրանից Գյումրին շատ կոնկրետ կտուժի:
– Տեսակետ շրջանառվեց, նաեւ պաշտպանության նախարարը եւ այլ պաշտոնատար անձինք էլ տարակուսանք հայտնեցին առ այն, որ պարզ չէ՝ Պերմյակովը միայնա՞կ է գործել, թե՞ ոչ: Այս վարկածը հավանակա՞ն եք համարում:
– Բազմաթիվ վարկածներ են քննարկվում, որոնց ես լուրջ չեմ վերաբերվում: Ավելին՝ ես գտնում եմ, որ սխալ է վարկածներ առաջ քաշել, քննարկել, ինչ-ինչ արտահայտություններ անել: Մի պաշտոնյա ասում է՝ կա վարկած, հետո նրա խոսքերը քննարկվելով, փոխանցվելով՝ այլակերպվում են, ու սուտը ստանում է ձնագնդիի էֆեկտ:
– Իսկ Ձեր գնահատմամբ՝ հայկական կողմը ռուսական ռազմաբազայում կարգուկանոնի հարցը պիտի՞ բարձրացնի:
– Ես գտնում եմ, որ պարտավոր է: Դա Գյումրիում շատ կարեւոր հարց է: Իմ գնահատմամբ՝ ռազմաբազայում կարգուկանոնը բացակայում է: Մեղմ ասած՝ այդ հարցին անլուրջ են վերաբերվել, ու արդեն որերորդ դեպքն է, որ դրա արդյունքում ողբերգական ավարտ է լինում: Աստված մի արասցե, եթե մի դեպք էլ լինի: Անկանխատեսելի հետեւանքներ կլինեն:
– Իսկ ռազմաբազայի գոյության կամ գոնե պայմանների վերանայման հարց հայկական կողմը պիտի՞ դնի, քանի որ ռուսական ռազմաբազայի բոլոր ծախսերը հայկական կողմն է հոգում:
– Դա այլ հարց է ու այս դեպքի հետ կապված չէ: Բնականաբար, մտածելու հարց է: Իշխանության խնդիրն է, թող իրենք մտածեն: Բայց կարգուկանոնի հետ կապված՝ մենք պարտավոր ենք ամեն ինչ անել, որ ռազմաբազայում կարգուկանոն լինի:
– Իսկ հետաքննությունն ամբողջությամբ հայկական կողմին հանձնելը մեր շահերից բխո՞ւմ է, թե՞ ոչ, քանի որ խոսակցություններ կան, որ ճշմարտությունը կարող է կոծկվել:
– Եթե հայկական կողմին հանձնվի, ինչ խոսք, մեր շահերից է: Բայց մենք հասկանում ենք, որ այս պարագայում մեզ հանձնելն անհնար է, ՌԴ-ն չի կարող իր քաղաքացուց, իր զինվորից ձեռքերն ամբողջությամբ լվանալ ու կողքի քաշվել: Հայկական կողմի քննության արդյունքում, կարծում եմ, դրական բաներ կլինեին, բայց, մեծ հաշվով, համատեղ քննության արդյունքում էլ կարող է դրական արդյունք լինել:
Զրույցը՝
ՆԵԼԼԻ ԳՐԻԳՈՐՅԱՆԻ
«Առավոտ» օրաթերթ
31.01.2015