Սառնաղբյուրցի ազատամարտիկ Մարտիրոս Ալեքսանյանն այդպես էլ չի հասկանում, թե ինչու են ձերբակալել իր որդուն՝ Մնացական Ալեքսանյանին, երբ նա էլ մյուսների նման Գյումրու ռուսական հյուպատոսարանի դիմաց իր արդարացի բողոքն էր հայտնում Ավետիսյանների անմեղ ընտանիքի սպանության համար: Ըստ նրա, իր որդին որեւէ տեղ փախչող չէր, որ ձերբակալեին: «Թող հարցաքննությունը ընթանա, ես կողմ եմ, դեմ չեմ, բայց ոչ ձերբակալմամբ: Եթե պետք է, ես անձամբ կներկայացնեմ որդուս հարցաքննության, թող պարզեն ինչ է կատարվել: Ուղեղիս մեջ չի տեղավորվում՝ Էդ ինչպես պատահեց, որ էդքանի մեջ մենակ իմ տղային ձերբակալեցին»,- հուզվում է հայրը:
Նա պնդում է, որ իր որդուն որեւէ ծանուցագիր չի ուղարկվել, եկել են Մարալիկի ոստիկանության աշխատակիցները, հրավիրել են Մարալիկի ոստիկանության բաժին, այնուհետ տեղափոխել են Գյումրի:
Ըստ Մարտիրոս Ալեքսանյանի, իր որդին Ասքերանում է ծառայել, դիպուկահար է եղել, մի քանի անգամ հետ է մղել ազերիների հարձակումները: «Ես նայել եմ տեսանյութը, իմ որդին ավելի շատ փորձում է հանգստացնել ժողովրդին, երբ քարեր են նետում, իրեն էլ է կպնում էդ քարերից, օրինակ՝ ճակատին: Ժողովուրդը որ խփում է, ինքը դառնում, հանգստացնում է, թե մի խփեք: Դուք բոլորդ էլ գիտեք, ֆիքսել եք, որ մարդիկ չէին փակել ճանապարհը, այլ խաղաղ երթով շարժվում էին դեպի հյուպատոսարան, բայց փակեցին ճանապարհը, թե ինչ կատարվեց, թե չեմ կարող ասել: Մենք այդ ժամանակ մտածում էինք, որ բոլորս էլ Ավետիսյաններ ենք, ժողովուրդը իր արդարացի պահանջն էր ներկայացնում, Ավետիսյանները չլինեին, կլինեինք մենք: Ես հիմա եկել եմ դատախազին մոտենալ, խնդրել, ասել ՝ ազատ արձակեք, մենք փախնող մարդիկ չենք, ցանկացած պահի, երբ պետք է տղաս կներկայանա: Անձամբ իմ ստորագրությունը վերցնեն, բայց կալանքը հանեն երեխայի վրայից»:
Հայրն ասաց, որ սառնաղբյուրցիները զանգահարել են, ուզում են ոտքի ելնել, սակայն ինքն է կանխել: «Եթե մերժեն իմ խնդրանքը, չեմ կարող ասել ինչ կանեմ, ես մինչեւ էս պահը, փորձում եմ եզրեր գտնել, որ կալանքը դուրս հանեն: Դրանից հետո իմ քայլերն անկանխատեսելի են լինելու: Իսկ թե ժողովուրդն ինչ կանի, չեմ կարող ասել», ասաց Մարտիրոս Ալեքսանյանը:
Կարդացեք նաև
Նունե ԱՐԵՎՇԱՏՅԱՆ
Լուսանկարը՝ www.hetq.am-ի
էս ինչ են ուզում սրանք մեր ժողովրդից!!! զզվեցրին էլիիիի, փոխանակ հանցագործներին հայտնաբերելու ու պատժելու, ընկել են արժանի փոխհատուցում պահանջող նորմալ մարդկանց հետևից…ամոթա, ամոոոթ….երևի չեն հանգստացել, հաթաթա են տալիս ժողովրդին, որ մի լավ ռումբ պայթի…