Ֆրանսիական խոհանոցի այս յուրօրինակ ճաշատեսակը շատ ինքնատիպ համ ունի եւ շատ հագեցնող է: Սա այն ուտեստներից է, որ կամ շատ հավանում են, կամ ամենեւին չեն հավանում: Իր խտության եւ չափից դուրս հագեցնող լինելու պատճառով այն համեմատելի է մեր խաշի հետ:
Անհրաժեշտ մթերքները
Սոխ-5-6 գլուխ (կարող եք օգտագործել եւ սպիտակ, եւ կարմիր սոխ)
Պրաս (բուլղարական սոխ, лук порей)-3-4 ճյուղ
Սխտոր-2-3 պճեղ
Ձիթապտղի յուղ-4 ճաշի գդալ
Կարագ-50 գրամ
Ալյուր-1 ճաշի գդալ
Սպիտակ գինի-100-150 գրամ
Արգանակ (տավարի, հավի կամ բանջարեղենի)-1-1,5 լիտր
Հաց (ցանկալի է ֆրանսիական բագետ կամ բատոն տեսակի)- 5-6 կտոր
Դեղին, կոշտ պանիր-150 գրամ
Կարդացեք նաև
Պատրաստման եղանակը
Սոխը, պրասն ու սխտորը մաքրել, լավ լվանալ: Սոխը կտրատել երկայնակի եւ բարակ շերտերով: Պրասը՝ օղակներով: Սխտորը՝ տաշեղներով:
Կաթսայի մեջ տաքացնել ձիթապտղի յուղն ու կարագը, լցնել սոխը եւ պրասը: Շատ ցածր կրակի վրա տապակել երկու ժամ: 1 ժամը լրանալուց հետո ավելացնել նաեւ սխտորը եւ եփել եւս մեկ ժամ: Այս ապուրի գլխավոր գաղտնիքը հենց դրանում է՝ սոխը պետք է շատ երկար եւ շատ մարմանդ կրակի վրա եփվի, որ ամբողջովին կարամելացվի: Ընթացքում պետք է պարբերաբար խառնել, որպեսզի տակը չկպչի: Երկու ժամ անց դառնում է միատարր, կպչուն զանգված: Այն ժամանակահատվածում, երբ սոխը տապակվում է, կարող եք պատրաստել արգանակը: Այն կարող է լինել ինչպես տավարի, այնպես էլ հավի կամ բանջարեղենային: Տավարի կամ հավի արգանակ պատրաստելու համար կաթսայի մեջ լցրեք համապատասխանաբար տավարի կամ հավի ոսկորները, մեջտեղից երկայնակի կիսած մեկ-երկու գազար, մեկ գլուխ սոխ կամ մի քանի պրասի կանաչ հատվածները, նեխուրի արմատ կամ ցողուն, մեկ պճեղ սխտոր: Բանջարեղենի արգանակի համար լցրեք նույն բաներն՝ առանց ոսկորների: Ավելացրեք 1,5-2 լիտր ջուր եւ եփեք: Մեկ ժամ հետո ավելացրեք մեկ ճաշի գդալ՝ ոչ լիքը, աղ:
Ըստ էության՝ արգանակն ու սոխը միաժամանակ պատրաստ կլինեն:
Երկու ժամ տապակվելուց հետո սոխի վրա ավելացրեք մեկ ճաշի գդալ ալյուր, լավ խառնեք, ավելացրեք սպիտակ գինին, կրկին լավ խառնեք, սպասեք մինչեւ գինին գոլորշիանա կիսով չափ եւ ավելացրեք քամած արգանակը: Հինգ-տասը րոպե հետո սոխով ապուրը պատրաստ կլինի: Այն բավականին խիտ պետք է լինի:
Այժմ անցնենք մատուցմանը: Հրակայուն ապուրամանների մեջ լցրեք մեկ-մեկուկես շերեփ սոխով ապուր (վստահեցնում եմ, որ այդքանը բավական է մեկ հոգու համար, քանի որ շատ հագեցնող է), վրան դրեք մեկ շերտ բագետ, որի վրա քերեք պանիր: Իրականում պետք է լինի շվեյցարական «գրյուեր» տեսակի պանիր, սակայն Երեւանի խանութներում ես «գրյուեր» չեմ հանդիպել, կարող եք ավելացնել ցանկացած պինդ պանիր՝ պարմեզանից մինչեւ գաուդա:
Դրեք ջեռոցի ամենավերին հարկում՝ ամենաբարձր ջերմաստիճանով, որպեսզի պանիրը հալվի եւ հացը կարմրի: Այդ ընթացքում ապուրն ավելի կխտանա, կրեմ-ապուրի խտություն կստանա: Երեք-չորս րոպեն լրիվ բավական է վերջնական արդյունքին հասնելու համար: Կարող եք վայելել:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
14.02.2015
