«Ամեն ինչ թղթով ճիշտ է Աղվան Հովսեփյանի և Գևորգ Կոստանյանի մոտ: բայց ստացվում է, որ նրանք ՌԴ իրավապահ համակարգի արտահաստիքային աշխատակիցներն են»,-այսօր «Նոյյան տապան» մամուլի ակումբում լրագրողների հետ հանդիպմանը հայտարարեց Գյումրիի «Ասպարեզ» միության նախագահ Լևոն Բարսեղյանը:
Նա նշեց, թե ՌԴ դատախազին Գևորգ Կոստանյանի նամակ գրելը և պատասխանը ընդամենը կրակը մարելու համար են արված: Պարոն Բարսեղյանը կարծում է, որ այս պահին ամենակարևորը անվտանգության երաշխքիներն են. «Սերժ Սարգսյանը պարտավոր է հանրությանը անվտանգության երաշխիքներ ներկայացնել, խոսքը տեխնիկական լուծումների և երաշխիքների մասին է»:
Պարոն Բարսեղյանը կրկին հիշեցրեց, թե դատախազությունը թերացել է և չի արել այն, ինչ պարտավոր էր, և արդյունքում զինված կերպով մարդ են հետախուզել, ձերբակալել, առևանգել և ազատազրկել: Այս փաստը վերլուծելով՝ պարոն Բարսեղյանն ասաց. «Օտար քաղաքացիները կարո՞ղ են մարդ հետախուզել մեր երկրում՝ զինված փողոց դուրս գալ, թե՞ դա միայն ռուսներին է թույլ տրվում: Կոնկրետ քրեական գործ պիտի հարուցվեր այդ հարցով»:
Հարցին՝ արդյոք գյումրեցիները կոտրվա՞ծ են, պարոն Բարսեղյանը պատասխանեց. «Ժողովուրդն իրեն կոտրված չի զգում, իշխանությունների կերպարանքը վաղուց հայտնի է գյումրեցիներին»: Դառնալով Ավետիսյանների ընտանիքի դեմ կատարված հանցագործության բացահայտմանը՝ պարոն Բարսեղյանն ասաց. «Շատ մասնագետներ ասում են, թե սա երկու-երեք շաբաթվա բացահայտվելիք գործ է: Կամ էլ իրոք, բացահայտել են և տեսել, թե ինչ հրեշավոր հանցագործություն է, վախենում են տրամադրել ազգաբնակչությանն այդ տեղեկատվությունը: Մտածում են՝ ինչպես այն մատուցել ու ներկայացնեն: Եթե կենցաղային բնույթի հանցագործություն լիներ, ապա վաղուց արդեն բացահայտված կլիներ, և հանրությունն էլ տեղյակ կլիներ»:
Կարդացեք նաև
Տաթև ՀԱՐՈՒԹՅՈՒՆՅԱՆ
