«Խոսքի ազատության պաշտպանության» կոմիտեի նախագահ Աշոտ Մելիքյանը Aravot.am-ի հետ զրույցում նշեց, որ «Արմնյուզ» հեռուստաընկերությունը խախտում է իր արտոնագրի պայմանները: Նրա խոսքերով՝ ըստ «Արմնյուզի» արտոնագրի պայմանների՝ նրա եթերի գերակշռող մասը պետք է լինի լրատվական՝ հասարակական, քաղաքական սոցիալական թեմաներին վերաբերող:
«Վերջին ժամանակներս այնտեղ գերակշռում են տարբեր տեսակի ժամանցային հաղորդումները, ֆիլմերը, տարբեր տեսակի տեսահոլովակները: Դա նախատեսված չէ արտոնագրի պայմաններում, այսինքն՝ «Արմնյուզը» պետք է գերազանցապես լինի լրատվական հեռուստաալիք: Այդ փոփոխությունը նկատվեց այնտեղ կադրային որոշ վերադասավորումներից հետո, եւ դա է պատճառը, որ ես, վերջին ժամանակների ընթացքում դիտարկելով նրանց հաղորդումները, եկա այդ եզրակացության»,- ասաց նա:
Աշոտ Մելիքյանի խոսքերով՝ Հեռուստատեսության եւ ռադիոյի ազգային հանձնաժողովը լավ չի հետեւում, թե ինչպես են հեռուստաընկերությունները կատարում արտոնագրով նախատեսված պայմանները:
Պարոն Մելիքյանը նկատեց՝ 2010 թվականին, երբ «Արմնյուզի» հաճախության համար մրցույթ էր հայտարարվել, հայտարարվել էր, որ այն պետք է օգտագործվեր որպես լրատվական ալիք: Հաճախության համար մրցում էին «Արմնյուզն» ու «Ա1+»-ը եւ հաղթող ճանաչվեց «Արմնյուզը». «Այն պարագայում, երբ այդ հեռուստաընկերությունը իր պարտավորությունները չի կատարում, կարծում եմ, որ կարելի էր համապատասխան գործողություններ կատարել, որոնք իսկապես պետք է կատարի ՀՌԱՀ-ը: Կարծում եմ՝ «Ա1+»-ը շատ ավելի հաջող կիրականացներ իր վրա վերցրած պատասխանատվությունը եւ այդ հաճախությունը կօգտագործեր որպես լրատվական հեռուստաալիք»:
Կարդացեք նաև
«Արմնյուզ» հեռուստաընկերությունից մեզ հայտնեցին, որ իրենք արտոնագրի պայմանները չեն խախտում. «Լրատվական բնույթի ուղղվածությունը պահպանվել է: Եթե ձեւաչափի փոփոխության մասին է խոսքը, ապա այս դեպքում էլ հեռուստաընկերությունը լրատվական ուղղվածություն ունի՝ հաղորդումների կեսից ավելին լրատվական բովանդակություն ունեն: Ուստի՝ կարծում ենք որեւէ խնդիր չկա»:
Ամի ՉԻՉԱԿՅԱՆ
