Գորիսի պետական համալսարանի ռեկտոր Յուրա Սաֆարյանը 12 ամյա կրթական համակարգին անցնելու կառավարության նախաձեռնությունը օգտակար է համարում:
«Ծանոթ եմ Գերմանիայի կրթական համակարգին, այնտեղ վերջին երկու տարիներին աշակերտները դպրոցում մասնագիտանում են, թե բուհում ինչ թեքումով շարունակեն: Այս առումով, Հայաստանում այդ համակարգի ներդրումը դրական երեւույթ կլինի: Աշակերտը դպրոցական վերջին տարիներին կկողմնորոշվի ու լրիվ ծանրաբեռնվածությամբ կաշխատի այդ առարկաների վրա»,- Aravot.am-ին ասաց ռեկտորը:
Նրա խոսքով, Հայաստանում կրթական նոր համակարգը գուցե դժգոհություն առաջացնի վաղ ամուսնանալու մտադրություն ունեցողների շրջանում. «Միգուցե ազգային առանձնահատկությունների առումով դժգոհություններ լինեն, իսկ մասնագիտական տեսանկյունից միայն դրականը կարելի է արձանագրել»:
Հիշեցնենք, որ Ազգային ժողովը քննարկում է «Կրթության մասին» եւ «Հանրակրթության մասին» օրենքներում փոփոխություններ կատարելու մասին օրենսդրական փաթեթեները, որով առաջարկվում է երաշխավորված նվազագույնը 9 ամյա կրթական համակարգից անցում կատարել 12-ամյա կրթության:
Արփինե ՍԻՄՈՆՅԱՆ
