Aravot.am-ը բազմաթիվ ահազանգեր է ստանում Շիրակի մարզի «Հիմնադիր խորհրդարան»-ի ղեկավար Արամ Հակոբյանի հարազատներից, նրա շրջապատի մարդկանցից առ այն, որ իրենք չգիտեն վերջինիս գտնվելու վայրը: Ըստ հարազատների, վաղ առավոտյան իրենց տունը խուզարկելուց հետո, ոստիկանները խուզարկություն են սկսել նաև «Հիմնադիր խորհրդարան»-ի Շիրակի մարզային գրասենյակում, որին մասնակցել է նաև Արամ Հակոբյանը:
Սակայն, ըստ նրա համախոհների ու հարազատների, խուզարկության ավարտից հետո՝ կեսօրին, ոստիկանները գրասենյակից դուրս են բերել Արամ Հակոբյանին, նստեցրել են 176ՏՏ02 մակնիշի ավտոմեքենան ու տեսադաշտից հեռացել են: Իրենք փորձել են հետևել՝ հասկանալու, թե ուր են տանում նրան, սակայն կես ճանապարհից կորցրել են հետքը: Արամ Հակոբյանը երկու բառ անգամ չի կարողացել փոխանակել իր շրջապատի մարդկանց հետ: Ըստ հարազատների, այդ ժամից սկսած իրենք տեղեկություն չունեն, թե ուր են տարել նրան:
ՀՀ քննչական կոմիտեից Aravot.am-ին փոխանցեցին, որ նա ձերբակալված է, գտնվում է Երևանում, նրա նկատմամբ քրեական գործ է հարուցվել ՀՀ Քրեական օրենսգրքի 236 հոդվածի 1-ին մասով, այն է՝ Ապօրինի կերպով զենք պատրաստելը
- Ապօրինի կերպով հրազեն, դրան համալրող դետալներ, ռազմամթերք, պայթուցիկ նյութեր կամ պայթուցիկ սարքեր պատրաստելը կամ նորոգելը՝ պատժվում է ազատազրկմամբ՝ առավելագույնը երեք տարի ժամկետով:
Նշենք, որ այսօր նռնակ էին հայտնաբերել Արամ Հակոբյանի տան կտուրից, տնեցիները պնդում են, որ իրենց կտուրը բաց է, ով ինչ ուզի, կկարողանա տեղադրել այնտեղ, նռնակը տեղադրվել է վերջինիս գլխին գործ սարքելու համար: ՀՀ քննչական կոմիտեից մեզ տեղեկացրեցին նաև, որ Արամ Հակոբյանը փաստաբան ունի, նրա շահերը պաշտպանում է Տիգրան Եգորյանը: Մենք կապ հաստատեցինք պարոն Եգորյանի հետ, վերջինս քննիչի մոտ էր, խոստացավ մեր հարցերին պատասխանել քիչ անց:
Կարդացեք նաև
Նունե ԱՐԵՎՇԱՏՅԱՆ
