Այսօր ԱԺ-ում քննարկվեց Զարուհի Փոստանջյանի, Արտակ Զաքարյանի եւ մի շարք այլ պատգամավորների պատրաստած ՀՀ ԱԺ հայտարարության նախագիծը Հայոց ցեղասպանության 100-րդ տարելիցի կապակցությամբ:
Հիմնական զեկուցող Զարուհի Փոստանջյանը պատմեց, որ ի սկզբանե ինքն ուզում էր Ցեղասպանության հռչակագրի դրույթներն ընդունվեին, բայց քանի որ ԱԺ արտաքին հարցերի հանձնաժողովում կային տարբեր դիրքորոշումներ եւ տարբեր տրամադրություններ, միաձայն որոշեցին ընդունել այնպիսի հայտարարություն, որտեղ միայն անդրադարձ կատարվի, որ արժեւորվում է Համահայկական հռչակագիրը:
Հայտարարության նախագծում մասնավորապես ասված է. «Հայաստանի Հանրապետության Ազգային Ժողովը
– հիմք ընդունելով ՄԱԿ-ի Գլխավոր Ասամբլեայի կողմից 1948թ-ի դեկտեմբերի 9-ին ընդունված «Ցեղասպանության հանցագործությունը կանխարգելելու եւ պատժելու մասին» կոնվենցիան, ՀԽՍՀ Գերագույն Խորհրդի կողմից 1988թ-ի նոյեմբերի 22-ին ընդունված «Օսմանյան Թուրքիայում հայերի 1915թ. ցեղասպանության դատապարտման մասին» օրենքը,
Կարդացեք նաև
– արժեւորելով «Հայոց ցեղասպանության 100-րդ տարելիցի Համահայկական Հռչակագրում» ամրագրված դրույթները,
– կարեւորելով միջազգային հանրության հետ համատեղ ուժերով մարդկության դեմ հանցագործությունների, ցեղասպանությունների դատապարտման եւ կանխարգելմանն ուղղված ջանքերում հայ ժողովրդի ունեցած ներդրումը,
– երախտագիտություն հայտնելով բոլոր պետությունների խորհրդարաններին եւ պետական կառույցներին, որոնք պաշտոնապես ճանաչել են Հայոց ցեղասպանությունը, ընդունել Հայոց ցեղասպանության ժխտումը քրեականացնող օրենքներ.
Կոչ է անում բոլոր երկրների խորհրդարաններին եւ միջխորհրդարանական կազմակերպություններին պաշտոնապես ճանաչել եւ դատապարտել Օսմանյան Թուրքիայում իրականացված Հայոց ցեղասպանությունը` որպես մարդկության դեմ ուղղված ծանրագույն հանցագործություն»:
Խոսրով Հարությունյանն առաջարկեց, որ հայտարարության տեքստում երախտագիտություն հայտնեն բոլոր պետությունների խորհրդարաններին, որոնք ճանաչել են Հայոց ցեղասպանությունը, բայց ոչ պետական կառույցներին:
ԱԺ նախագահ Գալուստ Սահակյանը համաձայնեց. «Պետական կառույցները չեն ընդունում նման փաստաթղթեր»:
Զարուհի Փոստանջյանն էլ համաձայնեց հանել դա:
Հռիփսիմե ՋԵԲԵՋՅԱՆ
