Վերջին օրերին Դիլիջանում խմելու ջրի ծորակներից պղտոր և տհաճ հոտով ջուր է հոսում: Այս երևույթը նորույթ չէ դիլիջանցիների համար: Նրանք այդ մասին բազմիցս բարձրաձայնել են, սակայն՝ անօգուտ: Հերթական անգամ դիլիջանցիները չեն ցանկանում հանդուրժել նման անբարեխիղճ վերաբերմունքն իրենց և քաղաքի հյուրերի նկատմամբ:
Դիլիջանի հանրության խնդրանքով, Օրհուս կենտրոնը նամակով դիմել է Հանրային ծառայությունները կարգավորող հանձնաժողովին, Ջրային տնտեսության պետական կոմիտեին և «Հայջրմուղկոյուղի» ՓԲԸ ղեկավարությանը:
Նամակում մասնավորապես ասված է, որ խմելու ջրի որակի անկման պարբերական դարձած այս երևույթն ուղղակիորեն ազդում է համայնքի բնակչության, ինչպես նաև հազարավոր զբոսաշրջիկների առողջության վրա, խալխլում է համայնքային անվտանգությունը: Խմելու որակյալ ջուրը ներկա ու ապագա սերունդների առողջության նախապայման համարելով՝ դիլիջանցիները պահանջում են պարտավորացնել «Հայջրմուղկոյուղի» ՓԲԸ-ին, կատարել իր պարտականություններն ըստ արտոնագրի, վերանայել Դիլիջան համայնքի ջրամատակարարման համար գոյացող վարձավճարի չափը, պարտավորեցնել պատասխանատուներին կազմակերպել բնակչության առողջության համապարփակ հետազոտություններ, պարտավորեցնել պատասխանատուներին փոխհատուցում տրամադրել բաժանորդներին պատճառված անհարմարության և վնասների համար:
Մարի Չաքրյան
Հայաստանի Օրհուս կենտրոնների տեղեկատվության պատասխանատու
