Էջմիածին քաղաքից սերված, Տավուշի մարզի Կողբ գյուղում բնակվող, պայմանագրային զինծառայող, 1990թ. ծնված Գեւորգ Վարդանյանին մեղադրանք է առաջադրվել այն բանի համար, որ նա հանդիսանալով քսանմեկ տարին լրացած անձ, փաստացի ամուսնական հարաբերություններ է հաստատել ակնհայտ տասնվեց տարին չլրացած, 1999թ. օգոստոսի 4-ին ծնված աղջկա հետ եւ փոխադարձ համաձայնությամբ պարբերաբար սեռական հարաբերություն է ունեցել նրա հետ:
Սահմանապահ զորամասի մոտոհրաձգային դասակի հրամանատար, ավագ լեյտենանտ Գ. Վարդանյանին մեղադրանք է առաջադրվել ՀՀ քրեական օրենսգրքի 141 հոդվածի 2-րդ մասի 1-ին եւ 3-րդ կետերով (« Քսանմեկ տարին լրացած անձի կողմից պարբերաբար սեռական հարաբերությունը տասնվեց տարին չլրացած անձի հետ կամ սեքսուալ բնույթի գործողություններ կատարելը տասնվեց տարին չլրացած անձի նկատմամբ»): Գ. Վարդանյանի նկատմամբ խափանման միջոց է ընտրվել չհեռանալու մասին ստորագրությունը:
Ըստ «Դատալեքս» դատական տեղեկատվական համակարգի՝ Տավուշի մարզի առաջին ատյանի դատարանում Գ. Վարդանյանն իրեն մեղավոր է ճանաչել, հրաժարվել է ցուցմունք տակ, իսկ նախաքննության ընթացքում ցուցմունք է տվել, որ ինքը ու համաքաղաքացի աղջիկը մանկուց միմյանց ճանաչել են, 2013 թվականից ընկերություն են արել, հասկացել են, որ սիրում են իրար, երկու կողմերի ծնողների համաձայնությամբ 2014թ. սեպտեմբերի 16-ին ամուսնացել են:
Գ. Վարդանյանը նախաքննության ընթացքում տված ցուցմունքում նշել է, որ իմացել է աղջկա 15 տարեկան լինելը, սակայն չի իմացել, որ 16 տարին չլրացած աղջկա հետ սեռական հարաբերությունը քրեական պատժելի արարք է համարվում:
Կարդացեք նաև
Դատարանը համարել է, որ քրեական գործով ամբաստանյալի պատիժն ու պատասխանատվությունը ծանրացնող եւ մեղմացնող հանգամանքներ չկան: Ապրիլի 18-ին Տավուշի մարզի առաջին ատյանի դատարանի դատավոր Ռաֆիկ Մելքոնյանը Գ. Վարդանյանին մեղավոր է ճանաչել նրան առաջադրված հոդվածով եւ դատապարտել 4 տարվա ազատազրկման: Սույն դատավճիռը կարող է բողոքարկվել հրապարկման պահից մեկամսյա ժամկետում:
Ոսկան ՍԱՐԳՍՅԱՆ
