Այսօր՝ մայիսի 21-ին «Վարդանանք» կրթահամալիրը յուրատեսակ հաշվետվություն ներկայացրեց՝ «Զուտ հայկական պատմություն» խորագրով միջոցառում, նվիրված Հայոց ցեղասպանության 100-րդ տարելիցին: Բեմականացման մեջ ներգրավված էին ե՛ւ աշակերտները, ե՛ւ ուսուցիչները, անգամ դպրոցի տնօրենն ու փոխտնօրենը: Միջոցառմանը ներկա էին ԱԺ պատգամավորներ, կրթության եւ մշակույթի ոլորտների մարդիկ, Երեւանի քաղաքապետի տեղակալ Արամ Սուքիասյանը:
Ինչպես Aravot.am-ի հետ զրույցում նշեց կրթահամալիրի հիմնադիր, Երեւանի քաղաքապետարանի հանրակրթության վարչության պետ Գայանե Սողոմոնյանը, եթե այլ դպրոցներ տիրոջ իրավունքով է մտնում, ապա այսօր աշակերտի կարգավիճակում է իրեն զգում՝ պատասխանատու լսարանի առաջ: Նա հայտնեց, որ միշտ երազել է ապագայի դպրոցի մասին ու իր ձեւակերպմամբ, չի համարձակվել «շոշափել» երազանքը՝ այն չփշրելու վախով ու շատ կուզենար, որ «Վարդանանքը» փոքր-ին մոտ լիներ իր երազանքի դպրոցին:
«Վարդանանք» կրթահամալիրի մասնագիտական աջակցության գծով փոխտնօրեն Արմինե Թոռունյանը խոսելով միջոցառման մասին, ասաց, որ այն կրում է «Զուտ հայկական պատմություն» խորագիրը. «Ստեղծել ենք մեր տարբերակը, դա ամեն մի հայի շատ բնորոշ ճակատագիր է: Ուզում ենք մեր հարյուրամյա պատմությանը նայել հավատով, մեր ապրումները, տխրությունը, ցավը թողնել անցյալում եւ այսօր լինել պահանջատեր, քանի որ հավատում ենք, որ հաղթելու ենք: Այսօր դպրոցում այն սերունդն է, որը վաղը ինքն է լինելու պահանջատեր»:
Կարդացեք նաև
Կրթահամալիրի տնօրեն Կատարինա Ազատյանի կարծիքով իրենց կրթօջախը բոլոր կրթօջախների նման է, քանի որ բոլորի նպատակն էլ որակյալ կրթությունն է եւ լավ քաղաքացի դաստիարակելը: Նրա ասելով, սցենարի մեջ նաեւ երեխաների ներդրումը կա, նրանց տվել են ստեղծագործելու եւ իրենց մտքի թռիչքի հնարավորություն:
ԱԺ պատգամավոր Ռուզան Մուրադյանը նշեց, որ կրթության մեջ արված ներդրումը լավագույն ներդրումն է, քանի որ այն տասնապատկված վերադառնում է, իսկ Արամ Սուքիասյանը խոսեց բեմականացման ռեժիսուրայի, խոսքի կուլտուրայի ու որակի մասին: «Այդ մենք պետք է երեխաներից հետաքրքրվենք՝ արդյոք լա՞վ հանդիսատես եղանք, արդյոք չխանգարեցի՞նք իրենց»,-ասաց փոխքաղաքապետը:
Կոմիտասի անվան կոնսերվատորիայի պրոֆեսոր, «Հայաստանի փոքրիկ երգիչների» հիմնադիր Տիգրան Հեքեքյանի երեխաները «Վարդանանք» կրթահամալիրի սաներ են: Նա ներկա պատգամավորներին խորհուրդ տվեց. «Լավ կլիներ, որ ամեն մեկը մյուսներին «իրենով անի» ու վարակի մտածել դպրոցի մասին: Այդ դեպքում ուրիշ երկիր կունենանք»: Նաեւ երազեց, որ վաղվա պատգամավորներ հենց այս երեխաները դառնան:
Գոհար ՀԱԿՈԲՅԱՆ
