Այսօր ԱԺ-ում Էկոնոմիկայի փոխնախարար Էմիլ Տարասյանը ներկայացրեց նախարարության 2014-ի բյուջեի կատարման հաշվետվությունը:
ԲՀԿ ղեկավար Նաիրա Զոհրաբյանը հարց ուղղեց Հակոբ Հակոբյանի՝ Ճոյտի գազալցակայանի պայթյունի հետ կապված: Նա ասաց. «Վերջին 10 օրում տեղի ունեցան երկու ողբերգական միջադեպ եւ երկու զոհ, Հակոբ Հակոբյանի եղբայրը մահացավ: Էկոնոմիկայի նախարարությունը մշակում է գազալցակայանների քաղաքականությունը: Ձեր դիրքորոշումը կուզենայի՝ դա ինչի՞ արդյունքում էր՝ սխալ մշակված քաղաքականությա՞ն, թե՞ վերահսկողությունը պատշաճ չի իրականացվել: Ի՞նչ հետեւություններ եք անելու, խնդիրը լուրջ է: Որպես քաղաքականությունը մշակող մարմին՝ ձեր պատասխանատվությունը տեսնո՞ւմ եք տեղի ունեցածում»:
Էմիլ Տարասյանը պատասխանեց. «ԱԳԼՃԿ-ներն ունեն տեխնիկական կանոնակարգեր: Անվտանգության վերահսկողությունն իրականացնում է արտակարգ իրավիճակների նախարարությունը: Թե ինչն է միջադեպի պատճառը, ես այս պահին չեմ կարող ասել, բայց ոլորտում բավականին խնդիրներ ունենք: Օրինակ, խոսքը վերաբերում այն կտրոններին, գազաբալոնների փորձարկմանը»:
Կարդացեք նաև
ԱԺ տնտեսական հարցերի հանձնաժողովի նախագահ Վարդան Այվազյանն էլ իր տեսակետը հայտնեց: Նա ասաց, որ ուրիշ երկրներում ավտոմատ է կատարվում գազալցումը, ոչ թե մարդիկ են անում, որ ինչ ճնշում ուզենան՝ տան. «Որեւէ մեկին չի թույլատրվում 250 ատմասֆեր ճնշում լցնել»:
Հռիփսիմե ՋԵԲԵՋՅԱՆ
